Jaipur, Risaw:
U Vaibhav Gehlot uba dei khun jong u Myntri Rangbah ka Rajasthan u Ashok Gehlot hynnin ka sngi u la leit mih hakhmat jong ka Enforcement Directorate ban shah tohkit ha kaba ïadei bad ka jingshah kynnoh ba u la pynkheiñ ïa ka kyndon jong ka Foreign Exchange Management Act, 1999, khyndiat sngi hadien ka jingshah khot hajir jong ka kynhun tohkit.
U la poi ha ka jaka treikam jong ka kynhun tohkit ha ka por 11:30 mynstep.
Ka jingshah khot hajir ka don bynta bad ka jingkhot hajir jong ka kynhun ED pyrshah ïa ka Triton Hotels & Resorts Pvt. Ltd., Vardha Enterprises Pvt. Ltd, kiba don ha Rajasthan bad ïa ki Director bad ki Promoters kiba kynthup ïa u Shiv Shankar Sharma, u Rattan Kant Sharma bad kiwei.
Ka la don baroh kumba T. 1.2 klur ka pisa ïa kaba la ïoh ban kurup da ka kynhun ED ha ka jingleit khynra ha u bnai ba la lah ha kaba ïadei bad kane ka jingjia.
Ka Hotel Group ka la shah pynshisha ba ka la ïoh ka jingbei tyngka na Mauritius ha snem 2007-2008.
U Vaibhav Gehlot, un sa sha kylli jingkylli ha kaba ïadei bad ki jingshah kynnoh donkti jong u bad u Rattan Kant Sharma.
U Ashok Gehlot hashwa u la ïaleh ban saitkhuid halor ka jingshah pynshisha ha kaba u la ong ba u khun jong u, u la long trai tang ïa ka Taxi Company, ha kaba u Sharma u la long u para ba la ïatreilang. “Kine ki la ïatreilang la kajong,” u la ong.
