Srinagar, Risaw:
Ki shipai ïada ri ki la lah ban khang lad ïa ka jingthmu rungtuh jong ki lehnoh ha ki bynta jong ka Kupwara distrik kaba don ha Jammu & Kashmir ha kaba ki la ïoh ban pynïap ïa uwei u lehnoh u bym shym la lah ban ithuh, la ïathuh ki pulit hynnin ka sngi. Kane ka jingpynpulom ïa katei ka jingthmu rungtuh jong ki lehnoh ka la jia ha ki bynta jong u Line of Control ha ka thaiñ Jumugund jong ka Keran Sector kaba don ha Kupwara.
“Ha ka jingïatreilang ha ka Sngi U Blei hapdeng ki shipai ka tnat Army bad ki pulit jong ka Kupwara Police da ka jingjop la lah ban khang lad ïa ka jingthmu rungtuh jong ki lehnoh ha ka thaiñ Jumagund jong ka Keran Sector, ha kaba uwei u lehnoh u la shah pynïap. Ka jingleit thwet lehnoh ka dang bteng,” la ong ka jingthoh ba la phah da ki pulit. Kane ka dei ka sien kaba ar ha kaba la lah ban pynpulom ïa ka jingthmu rungtuh jong ki lehnoh ha Kupwara distrik ha kine ki saw sngi ba la leit.
