Hyderabad, Risaw:
U President jong ka seng Telugu Desam Party ha Telangana u Kasani Gnaneswar ha ka Lah Sngi U Blei u la pynbna ïa ka jingiehnohkam hadien ka rai jong ka seng ba kan ym ïakhun ha ka ilekshon Assembly ka ban long ha ka 30 tarik, Naiwieng ha ka jylla.
Kum shi bynta ban pynbna ïa ka jingiehnohkam jong u ha ka jingïalang bad ki nongthoh khubor, u Gnaneswar u la ong ba u la shim ïa kane ka rai namar ba ma u bad ki nongbud jong ka seng jong u ha Telangana ki la sngewduh mynsiem na ka rai ba la ai da ki heh nongïalam jong ka seng.
“Ngi la long kiba la pynkhreh na ka bynta ban ïashim bynta ha ka ilekshon. Kam shym la don kano kano ka jubab ban ai na ka kynhun nongïalam bahakhliehduh jong ka seng halor ka jingkylli ïa ka daw ba ka seng kan ym ïakhun ha ka ilekshon. Ngim lah ban leh ei ei ka bym dei katkum ka hok ïa ki nongbud kiba don hapoh ka seng. Kumta nga la rai ban iehnohkam na ka seng,” u la ong ha ka jingïakren bad ki nongthoh khubor.
U la ong ba un sa ïakren bad ïamir jingmut bad ki nongbud jong u ha kaba ïadei bad ka jingthmu jong u ban shim ïa ka sienjam ban wan.
Ka rai jong ka seng ha kaba ïadei bad ka jingthmu ban ym ïakhun ha ka ilekshon ka la pynlong ïa u Gnaneswar ba un buh ki jingkylli haba u la ïakynduh ïa u Myntri Rangbah barim bad u heh nongïalam jong ka seng TDP u N Chandrababau Naidu ha ka patok ba la set ïa u ha Rajamahendravaram kaba don ha Andhra Pradesh dang shen.
