New Delhi, Risaw:
Ka kynhun Enforcement Directorate ha ka Lah Sngi U Blei ka la khot hajir ïa u Myntri Rangbah jong ka Delhi u Arvind Kejriwal na ka bynta ban buh jingkylli halor ka kam bamsap kaba la mih na ka jingpyntreikam ïa ka kyiad.
U la dei ban leit mih hi dalade hakhmat ka jaka treikam jong ka kynhun kaba don ha Delhi ha ka 2 tarik, Naiwieng.
Ha u bnai, Ïaïong, ka kynhun Central Bureau of Investigation (CBI) ka la khot hajir ïa u Kejriwal na ka bynta ban tohkit halor kane ka jingjia.
Ki jingshah khot hajir jong u ki la long khyndiat kynta hadien ba ka Supreme Court ka la kyntait ban ai jamin halor ka jingkyrpad jong u Symbud Myntri Rangbah barim u Manish Sisodia, uba la long u snar nongïalam halor ka jingshah kynnoh donkti ha ka jingjia.
Ka jingwad bniah ka long halor ka jingleit jingwan jong ka pisa kaba T. 338 klur ha kaba ïadei bad ka jingjia, la ong ki nongbishar, kiba la ong ba ki jingdon bun jong ki sakhi ki la dei ban paw pyrthei.
Ka kynhun jong ki nongbishar kaba kynthup ïa u Justice Sanjiv Khanna bad SVN Bhatti, kiba la khmih bniah halor ka jingkyrpad jamin, ki la hukum ba la dei ban pynkut noh ïa ka jingwad bniah hapoh ki hynriew ne phra bnai halor ka jingjia.
Ha kaba ïadei bad kane, ka kynhun ka la ïaid shakhmat ban shim ïa ki sienjam na ka bynta ban pyndep ïa ka jingtohkit kumba la buh por da ki nongbishar.
U Sisodia u la shah set patok naduh ba u la shahkem ha ka kynhun Central Bureau of Investigation (CBI) ha ka 26 tarik, Rymphang.
