Kynnoh u Gehlot ba pyndonkam bakla ka sorkar ïa ki kynhun tohkit

Ka kynhun ED ka la hap ban tohkit bniah ïa u Vaibhav halor ka jingshah kynnoh jong u ba u la pynkheiñ kyndon halor ka jingkylliang ïa ka pisa bar ri.

Jaipur, Risaw:

U Myntri Rangbah jong ka Rajasthan u Ashok Gehlot u la kynnoh ba ka seng BJP kaba lamkhmat ïa ka sorkar kmie ka la pyndonkam bakla ïa ki kynhun tohkit tang na ka bynta ban ïoh jingmyntoi ha kaba ïadei bad ki kam saiñ pyrthei, bad ong ba kine ki buit ki la ïai bteng ban treikam na ka bynta ka seng BJP namar ba ki paidbah ki la tip shaphang jong ka.

U khun jong u Gehlot u Vaibhav Gehlot u la leit mih hakhmat ka kynhun Enforcement Directorate (ED) na ka bynta ban sha tohkit ha kaba ïadei bad ka jingshah khot hajir ha ka kynhun.

Ka kynhun ED ka la hap ban tohkit bniah ïa u Vaibhav halor ka jingshah kynnoh jong u ba u la pynkheiñ kyndon halor ka jingkylliang ïa ka pisa bar ri.

Kane ka kynhun toh-kit ka la khot hajir ïa u Vaibhav Gehlot, ha ka taïew ba la dep, ha kaba la hukum ïa uba u la dei ban leit mih hakhmat ki heh jong ka kynhun ha ka jaka treikam kaba don ha A P J Abdul Kalam Road ha kaba ïadei bad ka jingtreikam jong ka Foreign Exchange Management Act FEMA.

U Gehlot u la kynthoh jur ïa ka seng BJP ha kaba u la ong ba kam shym la don eiei halor kane, ka dei ka jingleh jingkam kaba la long ha ki 12 snem ba la leit, ha kaba kam shym don ei ei.

Ki la leit ban khynra ïa ki jaka sah bad ki jaka treikam jong u heh nongïalam jong ka seng Congress ha Rajasthan, kim shym kylli jingkylli ei ei ïa u, hynrei ka jingpyntreikam ka la ïaid hapoh ka jaka sah jong u.

Ki la don ki jingpyntreikam halor kane baroh ha Rajasthan bad kane ka la pynlong ïa ki ba kin khyllie biang, la ong u Ashok Gehlot ha ka jingïakren bad ki nongthoh khubor.

Ka kynhun ED ka la leh ïa kine ki jait kam da ki hukum jong kito kiba don ha ka sorkar kmie, la ka long ha Chhattisgarh, Rajasthan ne ha Madhya Pradesh, kin treikam na ka bynta ban shimkabu ïa ka seng Congresss naba ki paidbah ki la tip shaphang ki buit pyntreikam jong ka seng BJP, u la ong.