Chennai, Risaw:
Ka sorkar Tamil Nadu ka la buh da ka jingmudui ha Supreme Court pyrshah ïa u Lat u R N Ravi halor ka jingshah kynnoh jong u ba u la pynsahteng ha kaba ïadei bad ka jingpynkhuid ïa ki Bill.
Ka sorkar jylla ka la leit mih sha Supreme Court ban pyrshah jur ïa u Lat halor ka jingbym pynkhuid ïa ki Bill bad ki Government Order ïa kiba la phah da ka Tamil Nadu Legislative Assembly bad ka sorkar.
“Ka jingphah jingmudui kaba long da ka Writ Petition la mudui hapoh ka jingtreikam jong ka Article 32 jong ka Constitution of India, ban pynshai halor ki jingbym leh ei ei, ki jingpyndkoh bad ki jingbym lah ban pynurlong ïa ki rukom pyntreikam ha kaba ïadei bad ki jingai hukum ba la leh da u Lat jong ka Tamil Nadu bad ka jingmynjur ha kaba ïadei bad ka jingpdiang ïa ki Bill bad ka jingphah da ka Tamil Nadu State Legislature sha u bad ka jingbym don ki File ki ban buh ïa kine baroh, ki Government Order bad ki rukom pyntreikam kiba la phah na ka bynta ban pan jingsoi na u ki long ki bym long katkum ka Riti synshar, kiba beaiñ, kiba khlem daw ha kaba ïadei bad ki kamram ba u la dei ban pyndep,” la ong ka jingmudui ba la phah.
Ha kaba ïadei bad ka jingmudui ban shah khot hajir, ka sorkar Tamil Nadu ka la pynpaw ïa ki 12 tylli ki Bill kiba dang sah bad u Lat.
