Mumbai, Risaw:
U Chairman jong ka Reliance Industries u Mukesh Ambani ha ka Lah Sngi U Blei u la shah byrngem pynïap bad dawa ba u die ban siew T. 400 klur.
Kane ka dei ka sien kaba lai ha kaba u la ïoh kum kine ki jingshah byrngem tang hapoh ka shi taïew.
Kumba la ïathuh u heh pulit, la ong ba u nongphah bad ka Email ID ki long kajuh, ha kaba ka la don ka jingkylli tang ha kaba ïadei bad ka jingpynkiew ïa ka pisa ba la dawa. Ïa ka Email la dep ban wad bniah biang sha Belgium.
Ha kaba ïadei bad kane, ki la don ki shipai kiba la syrtap bad kiba la pahara ïa ka ïingsah jong u Ambani ha Antilia.
Ka E-mail kaba u la ïohpdiang ka long kumne, “Mynta ka dor jong ka pisa ka la long T. 400 klur, bad ki pulit kim lap dien ne lah ban kem ïa nga. Kam pher la ka kynhun pahara ka khlaiñ katno katne ruh, tang uwei na ki Sniper jong ngi u la lah ban pynïap ïa phi.”
Hashwa kane, u Ambani u la ïoh ban pdiang ïa ka khubor byrngem ha kaba la dawa pisa bad byrngem ban shah pynïap, da kaba un shah siat ïap lada um lah ban siew ïa ka pisa kaba T. 20 klur.
Une u heh spah u la ïohpdiang lyngba ka Email ha kaba ïadei bad ka jingshah byrngem ha ka por 8:51 jong ka miet sngi Thohdieng, ha ka 27 tarik, Risaw.
“Ym slem hadien ba kine kiei kiei baroh ki la jia, ka la don ka jingbuh jingmudui hapoh ka jingtreikam jong ki kyndon 387 bad 506 (2) jong ka Indian Penal Code (IPC) ha Gamdevi PS jong ka Mumbai,” la ong ka jingthoh kaba la wan na ki pulit.
Hadien kane, ha ka 28 tarik, Risaw, u Ambani u la ïoh sa kawei pat ka jingshah byrngem pynïap lyngba kajuh ka Email Account.
Ha kaba ïadei bad kane, u nongdawa pisa u la dawa sa T. 200 klur ha kaba la ong ba ïa ka pisa la pynkiew namar ka jingbym ai jubab ei ei jong u halor ka Email kaba hashwa.” Ka Mail kaba la ïohpdiang ha ka sien kaba ar, ka la ong,”Phim shym la jubab ïa ka Email jong ngi mynta ïa ka pisa la dawa ba la dei ban siew sa T. 200 klur lym kumta la soi ïa ka jingthoh ba la dei ban shah pynïap”.
