Srinagar, Risaw:
Uwei u nongbylla u bym dei u trai shnong u la shah siat ïap ha ki lehnoh ha ka shnong Nowpora jong ka Pulwama kaba don ha ka bynta ba shaphang Shathie jong ka Kashmir ha ka Lah Sngi U Blei. Kane ka dei ka sien ba ar ha kaba ïadei bad ki kam thombor jong ki lehnoh naduh ka Sngi U Blei ha ka thaiñ. Ki heh pulit ki la ong ba ki lehnoh ki la siat ïa uwei u briew u bym dei u trai shnong ha ka thaiñ Tumchi Nowpora jong ka Pulwama.
“Ïa une u nongbylla la tip kyrteng kum u Mukesh jong ka jylla Uttar Pradesh. Une u la khlad noh naba jur palat ki jingmynsaw,” ki la ong. Kumba la ïathuh ka tyllong khubor jong ki pulit, la ong ba ym slem hadien ba la jia kane ka jingjia, ïa u Mukesh la pynkit mar mar sha ka jaka ai jingsumar ha kaba ki nongsumar ki la pynbna ba u la khlad hashwa ban pynpoi ïa u sha ka jaka ai jingsumar.
Ha kaba ïadei bad ka jingjia, ym slem hadien ka jingshah thombor, ka kynhun shipai ka la leit ban pahara ha katei ka jaka bad ka la don ka jingleit thwet kaba jur ban ïohkem ïa ki nongthombor. U heh pulit jong ka Jammu & Kashmir u la shah thombor ha ka Sngi U Blei ha ka thaiñ ba sharum jong ka Eidgah Srinagar. Une u pulit u dang ïakhun bad ka jingim jong u ha ka jaka ai jingsumar.
U Director General of Police (DGP) jong ka Jammu & Kashmir u Dilbagh Singh u la ong ba ki pulit kin ym kheiñ sting ha kaba ïadei bad kine ki jingjia bad ki la dei ban long kiba la pynkhreh naba ki jingbuh jingma ki dang ïai bteng.
