Mumbai, Risaw:
Ki pulit ki la kem noh ïa 49 ngut ki briew kiba la donkti ha ka jingïakynad kaba la jia ha Beed distrik jong ka Maharashtra kaba la mih na ka jingïakhih halor ka jingdawa ban mang ïa ka bhah kaba kyrpang na ka bynta ka Maratha, la ïathuh ki heh pulit hynnin ka sngi.
Ka la don ka jingpyntreikam ïa ka Curfew ha kiba bun ki bynta jong ka Beed distrik ha ka janmiet jong ka Lah Sngi U Blei hadien ba ki la mih shibun ki jingïakynad bad ki jingthombor kiba long pyrshah ïa ki jingdon jingem jong ki riewsaiñ pyrthei.
Kumba ka long mynta, la ong ba ka jinglong jingman hapoh kane ka distrik ka dang don hapoh ka jingshah tehlakam, la ïathuh u Superintendent of Police jong ka Beed u Nandkumar Thakur ha ka jingïakren bad ki nongthoh khubor.
“Ki la don ki jingbuh jingmudui halor ki kam thombor bad ka jingbuh jingma ïa ka jingim jong ki briew ha kaba ïadei bad kine ki jingjia. Haduh mynta, ki la don kumba 49 ngut ki nongïakhih kiba la shahkem. Kumba la sakhi, la ong ba kim shym la don shuh ki jingïakynad ki ban mih hadien ba la lah ban tehlakam,” u la ong.
Ki la don shuh shuh ki kynhun pulit ba la pyntreikam ha ka distrik na ka bynta ban pynlong ïa ka jingpahara, ha kaba ki jinglong jingman mynta ki la don hapoh ka jingshah tehlakam, la ïathuh shuh shuh u heh pulit.
