Jaipur, Naiwieng:
Ka seng Congress ha ka Sngi Ba-ar ka la pyllait ïa ka thup kyrteng kaba saw jong 56 ngut ki kyrtong ki ban ïakhun ïa ka ilekshon Assembly ha Rajasthan. Ha kane ka thup kyrteng la pynduh noh ïa 8 ngut ki MLA ba mynta jong ka seng naba ïa ki tiket la ai noh sha u Manvendra Singh uba dei u khun jong u heh nongïalam uba la khlad noh jong ka seng Bharatiya Janata Party (BJP) u Jaswant Singh ba un ïakhun na Siwana kaba don ha Barmer distrik.
Ka seng Congress kaba bat ïa ka jingsynshar ha ka jylla haduh mynta ka la dep ban pynbna ïa ki 151 tylli ki kyrteng jong ki kyrtong na ka bynta ka jingshah jied sha ka kynhun jong ki 200 ngut ki dkhot jong ka Rajasthan Assembly, ka ban sa pynlong ïa ka jingthep vote ha ka 25 tarik, Naiwieng.
Kane ka seng ka la pynïakhun ïa u nongai-ktien jong ka ha ka ri u Gourav Vallabh na Udaipur.
Kumta ka seng kaba la don ka jingkyrmen ba kan sa ïoh ban bat biang ïa ka jingsynshar ha ka jylla, ka la pynbna sa ïa 32 tylli ki kyrteng jong ki kyrtong kiba thymmai ha ka thup kyrteng kaba saw.
Ki MLA ba mynta kiba la shah pynduh tiket ban ïakhun na ka seng ki kynthup ïa u Khiladi Lal Meena, Bharat Singh Kundanpur, Bharosi Lal Jatav, Heera Lal Meghwal, Johari Lal Meena, Babu Lal Bairwa, Sandeep Yadav bad u Rajkumar Gaur.
Ki MLA shimet kiba kynthup ïa u Mahadev Singh Khandela bad u Kanti Prasad Meena ki la shah pynïakhun na Khandela bad Thanagazi. Hashwa kane, ka la don ka Central Election Committee jong ka seng ha ka janmiet jong ka sngi Ba-ar ha kaba ki la don ki jingïakren bad ki jingïamir jingmut halor ki kyrteng jong ki kyrtong kiba ibit ban ïakhun ha ka ilekshon ha Rajasthan.
U President jong ka seng Congress u Mallikarjun Kharge, ka heh nongïalam barim jong ka seng ka Sonia Gandhi, u Myntri Rangbah jong ka Rajasthan u Ashok Gehlot, u nongpynïaid jong ka All India Congress Committee (AICC) jong ka jylla u Sukhjinder Randhawa bad u heh nongïalam jong ka seng ha ka jylla u Govind Dotasra ki la don bynta ha ka jingïalang.
