Ranchi, Naiwieng:
Kumba la bna khubor la ong ba ka President ba mynta jong ka seng Congress bad ka MP na Singhbhum ka Geeta Koda ka lah ban leit pynïasoh bad ka seng BJP hashwa ka ilekshon Lok Sabha 2024, shen, ka la pep ban leit ne don bynta ha ki prokram jong ka seng bad wat ha ka jingleit jngoh ïa u nongkhmih bad nongpynïaid jong ka seng Congress ha Jharkhand u Avinash Panday.
Ka seng BJP ka la pynpaw ba ka don ka jingkyrmen skhem ba kan jop ha baroh 14 tylli ki Lok Sabha konstitwensi ha Jharkhand bad lada ka Geeta Koda ka leit ban pynïasoh bad ka seng, kan sa long kaba suk ba kan ïoh ïa ka jingjop.
Kumba ka long mynta, la ong ba ka kynhun synrop hapdeng ka seng BJP bad AJSU ka la don 12 na ki 14 tylli ki Parliamentary Seat ha Jharkhand.
“Ngi la trei shitom na ka bynta ban ïoh ïa ka Geeta Koda ha ka kynhun jong ka seng BJP bad ngi dang ïai ap ïa ka por ban pynrung dkhot ïa ka hapoh ka seng BJP,” la ong ka tyllong khubor kaba la wan na ka seng BJP.
Kumba la khmih lynti, la ong ba kin sa don bun ki nongïalam jong ki seng saiñ pyrthei kynthup ka Geeta Koda, kiba lah ban leit pynïasoh bad ka seng ha ka sngi jong ka jingleit jngoh u Myntri Rangbahduh u Narandera Modi sha Ulihatu, kaba dei ka jaka ba la kha ïa u khlur ka kynhun riewlum bad u nongïaleh laitluid u Bhagwan Birsa Munda, ha ka 15 tarik, Naiwieng.
