New Delhi, Naiwieng:
U Myntri Rangbah jong ka Delhi bad u heh nongïalam jong ka seng Aam Aadmi Party (AAP) u Arvind Kejriwal, uba la dei ban leit mih hakhmat jong ka kynhun Enforcement Directorate hynnin ka sngi ha kaba ïadei bad ka jingshah kynnoh donkti ha ka kam bamsap kaba la mih na ka jingpyndkoh treikam ha ka tnat Excise, u la pep ban leit mih hakhmat ka kynhun tohkit ha kaba u la ai daw ba u la dei ban leit sha ka jingïalap ilekshon ha ki surok ha Madhya Pradesh.
Ha kaba ïadei bad kane, kiba bun ki kynhun jong ka Enforcement Directorate (ED) ki la pynlong ïa ki jingleit khynra sha ki 10 tylli ki jaka, kynthup ha ka ïingsah jong u Myntri ka Social Welfare u Raaj Kumar Anand ha ka thaiñ Civil Lines kaba don ha North Delhi.
Ha ka por mynstep jong kane ka sngi, u la phah jingthoh sha ka kynhun tohkit bad ong ba kane ka jingkhot hajir ka dei kaba beaiñ bad kaba leh kam saiñ pyrthei.
U Kejriwal u la shah buh jingkylli ha ka kynhun Central Bureau of Investigation (CBI) ha ki hynriew bnai ba la leit bad ka kynhun AAP ka la pynpaw ïa ka jingsngew jong ka ba u Kejriwal un sa long u banyngkong u ban shahkem kum shi bynta na ka jingkynnoh ba ka seng BJP ka la thmu ban leh donbor pyrshah ïa ki nongïalam jong ki seng ha ka kynhun INDIA hashwa ka jingpynlong ïa ka ilekshon Lok Sabha ha u snem 2024.
Ha kaba ïadei bad ka jingshah khot hajir jong u Kejriwal ha ka kynhun ED, u General Secretary jong ka seng BJP ha ka ri u Dushyant Gautam u la ong, “Haba ki kynhun sorkar ki khot ïaphi, phi la dei ban leit bad ban sngewthuh shai balei ba ki khot hajir ïaphi. Ka daw ka long ba ki nongïalam kiba la shah set patok ki lah ban donkam ïa ki jingsakhi, ha kaba yn ïoh ïa ki sabut. Lada ym don ei ei kyntait hangto. Hynrei ka ri kan sa pyntreikam katkum ka Riti synshar. Ym ba ka jingleit hangtei, nga pyrkhat ka long kaba sniewbok. U la leit sha Madhya Pradesh na ka bynta ban leit ïalap ilekshon, ka long kaba bha. U la ïalam ruh ïa u nongñiah kali bad u Pilot bad u. Kine kim lah ban synshar ïa ka Punjab ne ban ai jingïarap sha ki paidbah hangtei, kumta u la buh ïa u Pilot bad u, baroh ar, kata ka Punjab bad ka Delhi ki la shah ktah jur. Ka long ka jingsniewbok ïa ka synshar paidbah.”
