Lucknow, Naiwieng:
Ka seng Samajwadi Party (SP) ha ka sngi Balang ka la pynpaw ba kan sa ïakhun ha ki 65 tylli na ki 80 tylli ki Lok Sabha konstitwensi ha Uttar Pradesh ha u snem 2024.
U President jong ka seng SP u Akhilesh Yadav, uba la don bynta ha ka jingïalang ba la pynlong da ka seng ha ka jylla, u la wer ïa ki nongbud jong ka seng ba ki la dei ban pynkhreh bha na ka bynta ban lah weng noh ïa ka seng na ka bor synshar ha ka jingïakhun ïa ka ilekshon Lok Sabha ha u 2024.
Kane ka ilekshon ka ban sa long kan sa ai ïa ka rai ha kaba ïadei bad ki lawei ban wan. Kan sa long ka ilekshon kaba khatduh na ka bynta ban ïada ïa ka jingsynshar paidbah bad ïa ka Riti synshar.
Ka seng SP kaba la lamkhmat ïa ka kynhun synrop kan sa ïakhun ïa ka ilekshon ha ki 65 tylli ki konstitwensi. Ka seng Samajwadi Party, kaba long ka seng kaba paw jong ka kynhun synrop Indian National Developmental Inclusive Alliance INDIA jong ki seng ka liang pyrshah, ka la pynpaw ruh ba kan sa ïakhun ha ki 65 tylli ki konstitwensi ha kaba ïa kiba sah kan sa ai sha kiwei pat ki seng kiba don ha ka kynhun synrop.
