Hyderabad, Naiwieng:
Ki longkmie ha Telangana ki lah ban ïoh jingmyntoi haduh T. 4,000 lada jia ba ka seng Congress ka ïoh ïa ka bor synshar ha ka jingïakhun ïa ka ilekshon Assembly ka ban long ha ka 30 tarik, Naiwieng, lyngba ka baibam tymmen, ka jingkynshew pisa na ka LPG Cylinder bad ka jingïoh leit jingleit lada shong ha ki bos sorkar khlem donkam siew, la ong u heh nongïalam barim jong ka AICC u Rahul Gandhi hynnin ka sngi.
Ha ka jingai jingkren jong u ha ka por ba ka la don ka jingïalang bad ki longkmie ha ka shnong Ambatipalli kaba don hajan Medigadda (Laxmi) Barrage jong ka Kaleshwaram Project, u la ong ruh ba ka seng Congress ka la rai ban pynphai biang ïa ka pisa ba la shah lute ha u Myntri Rangbah jong ka Telangana u K Chandrasekhar Rao.
“Ki longkmie ha Telangana ki la long ki briew kiba la shah ktah jur na ka kam lute jong u Myntri Rangbah ha ka jylla. Ka seng Congress ka la rai ba la dei ban thep ïa ka pisa kaba la shah lute ha u Myntri Rangbah sha ki Bank Account jong ki,” la ong u Rahul.
U la ong ba naba ka sienjam kaba nyngkong, ka long ba man u bnai, ïa ka pisa kaba T. 2,500 yn sa phah kum ka bai bam tymmen sha ki Bank Accoun jong ki longkmie.
Kumjuh, T. 1,500 yn sa ïoh ban pyllang ne kynshew lada ka seng Congress ka ïoh ïa ka bor synshar, yn sa phah ruh ïa ka LPG Cylinder, kaba long mynta ha ka dor T. 1,000, da 500 bad kawei pat kaba long T. 1,000 da kaba pyllait ei ïa ka bai leit jingleit lada shong ha ki bos sorkar.
Kum shi bynta ban kynnoh ba ka Kaleshwaram Project ka la long kum ka “ATM” na ka bynta u KCR ban pynmih pisa, u Rahul u la ong ba khnang ban lah ban pyntreikam ïa ka Machine, baroh ki longïing ha Telangana ki la hap ban siew T. 31,500 shi sien shi snem haduh u snem 2040″.
