Ranchi, Naiwieng:
U MLA ba marwei jong ka seng NCP u Kamlesh Singh u la dep ban pynbna halor ka jingpynkut noh jong u ban ai jingkyrshan ïa ka sorkar synrop ha Jharkhand kaba hap hapoh ka jingïalam jong u Hemant Soren.
Ha ka jingpynlong ïa ka jingïalang bad ki nongthoh khubor ha ka jaka treikam kaba don ha ka ïingsah jong u ha Ranchi, u Singh u la pynshisha da kaba ong ba ki briew jong ka jylla ki la ïakynduh jingeh ha kaba ïadei bad ka jingbym synshar hok jong ka sorkar u Soren.
“Nga la ai ka jingkyrshan ïa ka sorkar synrop ba la lamkhmat da u Hemant Soren ha Jharkhand ha u snem 2019, hynrei kam shym la urlong katkum ka jingkhmih lynti jong ki 3.25 klur ngut ki briew jong ka jylla,” la ong u Kamlesh Singh. U Singh u la ong ba ka seng jong u ka la ai ka jingkyrshan ïa ka sorkar synrop hapoh ka jingïalam jong ka seng JMM ha u snem 2019 halor ka jingthmu ban pynlong Distrik ïa ka Sub-Division, hynrei kane ka jingdawa ba la neh slem ka la sah khlem da lah ban pynurlong ei ei.
U la buh ïa ka tarik kaba khatduh kaba la long haduh ka 31 tarik, Risaw na ka bynta ban pynbna ïa ka Hussainabad kum ka distrik, ïa kaba ym shym la ai da ka sorkar jylla, u la ong.
U MLA jong ka Hussainabad u la shah pynshisha ruh ba u la donkti ha ka ban tih beaiñ ïa ki marpoh khyndew ha kaba ka la jur bha ha ka jylla bad kane ka la wanrah ka jingduhnong kaba khraw ïa ka ïoh ka kot jong ka jylla.
U nongaiktien jong ka seng JMM u Supriyo Bhattacharya, ha kaba ïadei bad kane, u la ong ba ka jingweng noh ïa ka jingai jingkyrshan na u Singh kan ym don jingktah ei ei ha kaba ïadei bad ka sorkar kaba mynta.
Ha ka kynhun jong ki 81 ngut ki dkhot jong ka Jharkhand Assembly, ka kynhun synrop kaba don ha ka bor synshar ka la don kumba 48 ngut ki MLA, 30 ngut jong ka JMM, 17 ngut jong ka seng Congress bad uwei jong ka seng RJD.
Ka seng BJP ha kawei pat ka liang ka la don ïa 26 ngut ki MLA ha ryngkat ki 3 ngut jong ka AJSU Party. Ka seng NCP bad ka CPI (ML) ki la don mar uwei u MLA, nalor ki arngut ki kyrtong shimet. Kumba la ïathuh la ong ba hadien ba ka la don ka jingïapher jingmut hapoh ka seng NCP ha Maharashtra, u Singh u la long shi bynta jong ka kynhun kaba hap hapoh ka jingïalam jong u Ajit Pawar, ha kaba ka la leit ban pynïasoh bad ka seng BJP.
U Singh, ha kaba ïadei bad kane, u la ïai bteng ban don ha ka liang jong ka sorkar synrop ha Jharkhand, kaba kynthup ïa ka seng JMM, RJD bad ka seng Congress.
