Hyderabad, Naiwieng:
Kumba la sakhi, la ong ba ka jylla Telangana ka la don khyndiat eh ki jingjia ïatakhuh kali hynrei ki la don bun eh ki briew kiba la mynsaw bad ïap ha u snem 2022 kumba long ha kiwei pat ki jaka jong ka ri, la ong ka kaiphot ba la pyllait da ka Ministry of Road Transport and Highways.
Ha ki san snem ba la leit, ka jingdon jong ki jingjia takhuh kali ki la hiar na ka 4,70,403 sha ka 4,61,312 hynrei ka jingdon jong kiba mynsaw bad kiba ïap ka la kiew sha ka 1,57,593 ngut ha u snem 2018 sha ka 1,68,491 ngut ha u 2022.
Kumjuh ka Telangana ka la hiar ha ka jingdon jong ki jingjia takhuh kali na ka 22,230 ha u snem 2018 sha ka 21,619 ha u 2022.
Ha kaba ïadei bad kane, ki la don kumba 3,010 ngut ki briew kiba la duhnoh ïa la ka jingim ha u snem 2022, kaba la kiew na ka 2,064 ngut ha u snem 2018, kaba la kiew da 45.8% ha ki san snem.
Ka jylla ka la wan ha ka kyrdan kaba 8 ha ka ri na ka jingdon jong ki jingjia takhuh kali.
Nalor kane, ka la wan ba 10 ha ka jingdon bun jong ki briew kiba la ïap na ki jingjia takhuh kali ha u 2022; ka la long ba 8 ha u snem 2020 bad ba 9 ha u 2021.
Katba ka jingdon jong ki jingjia takhuh kali ki la hiar, ka jingdon jong kiba mynsaw bad ïap ka la kiew na ka 6,603 ha u 2018 sha ka 7,559 ha u 2022.
Ha kaba ïadei bad kine ki jingjia, na ka liang ki bor ba dei khmih ki la ïaleh ban nang pynduna ïa kum kine ki jingjia bad ban pyntreikam pyrkhing ha kaba ïadei bad ki kyndon ñiah kali.
