Lucknow, Naiwieng:
U Akhilesh Yadav, uba long u President jong ka seng Samajwadi Party (SP), u la ong ba ka seng Congress kan ym shah ieh ha kaba ïadei bad ka jingïasam ïa ki konstitwensi kumba la pynbeit na ka bynta ka ilekshon Lok Sahba 2024 ha Uttar Pradesh.
Hadien ka jingïakynduh bad ka kynhun nongïalam jong ka seng ha ka jylla ha ka 31 tarik, Risaw, ka seng SP ka la pyntikna ban ïakhun ha ki 65 tylli na ki 80 tylli ki Lok Sabha konstitwensi ha Uttar Pradesh.
Hashwa, u MP jong ka seng Samajwadi Party na Sambhal u Shafiqur Rahman Barq hadien ka jingong jong u President jong ka seng u Akhilesh Yadav ba ka seng jong u kan sa lah ban pynrem ïa ka seng BJP ha baroh 80 tylli ki konstitwensi ha Uttar Pradesh ha ka jingïakhun ïa ka ilekshon Lok Sabha 2024, u la ong ba ka seng kan ym lah ban pynrem ïa ka seng ba donbor jong u Narendra Modi tang marwei.
Ka seng Samajwadi Party ka la sdang ruh ban pynbiej ïa ki Dalit ha kaba ka la kyrpad ban kyrshan ïa ka seng kum shi bynta ban wanrah ïa ka jingthmu pyntreikam jong ka ha kaba ïadei bad ka jingïoh vote hashwa ban pynlong ïa ka ilekshon Lok Sabha ha u 2024 Lok Sabha bad ban leh ïa kane, ka kynhun ka la donkam ban khmih bniah hapoh ka jingïalam jong u Ramjilal Suman bad u Awadhesh Prasad.
Ha kaba ïadei bad kane, u Barq u la ong, “Kane ka biang eh ha UP namar ba ka seng jong nga kam shym la ïatreilang bad ka seng BSP. Namar kane, u Ramji Suman u la shah thung na ka bynta ban wan ïalam biang ïa ki Dalit sha ka liang jong ngi. Lada jia ba ki Dalit ki kynriah noh ha ka ban ïatreilang na ka seng BSP ba la lamkhmat ka Mayawati sha ka seng SP, kan sa ai jingmyntoi ïa u Akhilesh Yadav ha ka jingïakhun ïa ka ilekshon. Katkum ba la shem, la ong ba ki Dalit ki ju ïatreilang bad ai jingkyrshan ïa ka seng jong ka Mayawati.”
Ha kaba ïadei bad ka jingai jubab halor kawei pat ka jingkylli shaphang ka BJP la kan wan ne em ha ka bor synshar ha UP bad bteng biang ïa kajuh ka jingpyntreikam jong ka ha ka ilekshon ha u snem 2024, u Burq u la ong, “Baroh kiei kiei ki la long kiba longkam.
Haba phi pyrkhat ba kan long kaba suk kan long kumta. Lada dang don ka jingshim khia ha kaba ïadei bad ka ilekshon 2024, ka la long ka seng BJP ka ban ïakhun pyrshah ïa ka liang pyrshah.” Ha kaba ïadei bad ka jingkylli la ka seng SP kan lah ban ïakhun marwei ban pynkhyllem ïa ka seng BJP, u la ong, “Ka long kaba eh. Lada jia ba ka seng Samajwadi bad baroh ki seng ki ïatreilang, baroh kin sa lah ban pynrem ïa ka seng BJP. Ha kaba ïadei bad kane, ka seng SP kan ym lah ne kot bor dalade ban leh ïa kane. Ka seng Congress bad kiba bun kiwei pat ki seng ki la dei ban ai ïa ka rai kaba khatduh ha kaba ïadei bad ka ilekshon. Ki Myntri Rangbah jong kiba bun ki jylla ki la pyrshang ban ïatreilang.”
Kum ban shu pynkynmaw, la ong ba u Myntri Rangbah jong ka Telangana u K Chandrashekar Rao, u Myntri Rangbah jong ka Tamil Nadu u MK Stalin, u Myntri Rangbah jong ka Bihar u Nitish Kumar, bad ka Myntri Rangbah jong ka West Bengal ka Mamata Banerjee ki la ïakren ha kaba ïadei bad ka jingtrei shitom jong ki ban ïatreilang bad ki seng kiba don kajuh ka jingmut bad ka jingthmu ban pynkhyllem noh ïa ka jingsynshar jong ka seng BJP ha ka jingïakhun ïa ka ilekshon Lok Sabha 2024.
