Bengaluru, Naiwieng:
Ka sorkar jylla ha ka Sngi Thohdieng ka la ong ba ka la rai ban plie ïa kumba 65 tylli ki Primary Health Centres ha ‘Kalyana Karnataka’ (ha kaba hashwa la tip kum ka thaiñ Hyderabad-Karnataka).
Ka sorkar kan sa plie ïa kumba 65 tylli ki Public Health Centres ha ka thaiñ Kalyana Karnataka, la ong u Myntri ka tnat ka koit ka khiah u Dinesh Gundu Rao, ha kaba u la ong shuh shuh ba ka Kalyana Karnataka ka la duna da kumba 65 tylli ki Primary Health Centres bad ka sorkar jong u ka la leh ïa kane na ka bynta ban pynbiang ïa ki jingduna.
“Ka dei ka jingthmu na ka bynta ban sdang ïa kumba 65 tylli ki Primary Health Centres ha une u snem ba mynta ha ryngkat ka jingïatreilang bad ka Kalyana Karnataka Region Development Board (KKRDB),” u la ong ha ka jingthoh kaba u la phah ha ki lad phah khubor.
Ha kaba ïadei bad kane, u Myntri u la ong ba ki jingpynbha ïa ki ïing jong baroh ki District Hospital, ki Taluk Hospital, bad ki Community Health Centre ha ka jylla ki la long kawei na ki jingthmu pyntreikam ba la buh hakhmat eh da ka sorkar. Kane ka jingpynbna ka la long hadien ba ka la don ka jingshah kynnoh bamsap jong ka KKRDB ha kaba na ka liang jong u Myntri Rangbah jong ka Karnataka u Siddaramaiah u la hukum na ka bynta ban pynlong ïa ka jingtohkit ha kaba ïadei bad ka jingkynnoh ba ka la don ka kam bamsap ha ka KKRDB ha ka por ba la synshar da ka sorkar BJP, hadien ka jingmudui ba la wanrah da u nongïalam ka seng u Priyank Kharge.
U Kharge, uba long u Myntri ka Karnataka Rural Development and Panchayat Raj, u la ong ba ka la dei ban don ka jingtohkit kaba bniah bad kiba donkti kin sa shah pynngat ha ki kyndon aiñ.
“U Myntri Rangbah jong ka Karnataka u la hukum ban pynlong ïa ka jingtohkit halor ka jingpyndonkam bakla ïa ka pisa jong ka KKRDB. Ka la don da ki klur tyngka ka pisa ïa kaba ka la shah klop na ka bynta ki mat treikam kiba rieh bad na ka bynta ka jingbhah ïala kijong ki MLA. Kumba la kular hashwa, la ong ba kan sa don ka jingtohkit kaba bniah bad kiba la donkti kin sa shah pynngat ha ki kyndon aiñ,” la ong u Priyank Kharge, uba dei u khun jong u heh nongïalam jong ka seng Congress u Mallikarjun Kharge, ha ka jingphah jingthoh jong u lyngba ki lad phah khubor.
Ki nongïalam jong ka seng Congress hashwa ki la pynshisha da kaba ong ba ki la don kumba katto katne ngut ki nongïalam jong ka seng BJP ha Karnataka kiba la donktilang bad ki kontraktor bad kine ki la pyndonkam bakla ïa ka pisa ba la pyllait sha ka KKRDB.
Ka kam bamsap ka la long ka mat kaba hakhmat eh ba la kren ha ka por ba la don ka ilekshon ha Karnataka ïa kaba la dep ban pynlong ha u bnai Jymmang ha kaba baroh ar, kata ka seng BJP bad ka seng Congress ki la ïakdew kti markylliang halor kane.
