Kochi, Naiwieng:
Ka jingïap jong ki briew na ka jingbthei bom kaba la jia ha ka 29 tarik, Risaw ha Kalamassery, Kochi, ka la kiew sha ki saw ngut haduh hynnin ka sngi na ka jingkhlad noh jong kawei ka longkmie kaba la 62 snem ka rta na ka daw jong ka jingjur palat ki jingmynsaw ha kawei ka jaka ai jingsumar jong ki riewshimet.
Ïa kane ka briew kaba la ïap la tip kyrteng kum ka Molly Joy Mathew, kaba dei ka nongshong shnong jong ka Kalamassery. Kane ka la mynsaw na ka jinging da palat 80 % ha ka jingbthei jong u bom IED kaba la jia ha ka por ba la don ka jingïalang jong ka Witnesses Jehovah kaba dei ka kynhun jong ki kynhun Khristan jong baroh kawei ka pyrthei.
“Da ka jingsngew kthang halor ka jingjia, ngi da pynpaw ka jingsngewsih jur halor ka jingpynbna ïa ka jingduh noh ka mynsiem jong ka Molly Joy Mathew. Kane ka la shah sumar hadien ba ka la mynsaw ha ka jingbthei bom ha Kalamassery. Ka jingsngewlem ka leit sha ki bahaïing bad ki paralok baïajan jong ka Mathew,” la ong ka jingthoh kaba la wan na ka Jehovah’s Witnesses.
“Ka Molly, ha ka por ba ka dang shah sumar ha Ernakulam Medical Centre, ka la shitom na ka jingthut treikam jong u klong snam kaba la kem ïa ka ha ka lah sngi U Blei. Ka la khlad noh ha ka por 5 baje mynstep jong ka lah sngi U Blei,” la ong u TA Sreekumar, uba long u nongaiktien jong ka kynhun ki Khristan ha ka thaiñ.
Sa lai ngut ki briew kiba la mynsaw na ka jingbthei jong u bom, mynta ki la kham shitom jur bad kine ki dang shah sumar ha ki ar tylli ki jaka ai jingsumar jong ki riewshimet , u la ong.
Kiwei pat ki briew kiba la ïap na ka jingbthei bom ki dei kiba la tip kyrteng kum ka Leyona Poulose (55), Kumari Pushpan (53) bad ka KP Libina (12).
Ka kmie jong ka Libina bad u hynmen baheh jong ka ki la long napdeng kiba la kham mynsaw jur.
Kane ka khynnah kaba la 12 snem ka la shah tep noh ha ka jaka tep jong ka Jehovah’s Witnesses kaba don ha Koratty ha ka 4 tarik, Naiwieng.
Ha kaba ïadei bad kane, ka Ernakulam District and Sessions Court hynnin ka sngi ka la khmih bniah halor ki jingbuh jingmudui jong ka kynhun tohkit kaba kyrpang jong ki pulit ha kaba la ong ba la dei ban set patok ïa u Dominic Martin, uwei na ki snar ba la shah kynnoh donkti ha ka kam thombor na ka bynta ban ban tohkit ïa u.
