New Delhi, Naiwieng:
Kumba la sakhi, la ong ba ka jingmih jong kiba bun ki jingjia na ki jingkren ban wanrah ka jingïashun, ka jingïakawang maw, ka jingrah da ki tiar pynmynsaw, ka la ktah jur ïa ki kynhun rit paid bad kiwei pat ki jingpynkheiñ ïa ki kyndon ha ka por ba la don ka Yatra jong ka VHP Shaurya ha kylleng ka ri ka la pynshai kdar ba ka jingim jong ki rit paid kam don jingshngaiñ.
Kane ka la long hadien ba la jia kine ki jingjia ha ka 4 tarik, Risaw, haba ka Calcutta High Court ka la ai jingbit halor ki jingkyrpad ba la buh da ki nongmihkhmat jong ki kynhun ka Hindutva ba la tip kum ka Vishwa Hindu Parishad (VHP) bad ka Bajrang Dal, ba kin pynlong ïa ka “Shourya Jagran Yatra” ha ka jylla West Bengal.
Ka kynhun nongbishar kaba don tang uwei u nongbishar kata u Justice Jay Sengupta ka la ong ba ki kynhun kin lah ban pynpaw sha ki briew jong ka West Bengal shaphang ka jinglen lade ba la leh da ki nongïaleh laitluid.
Ka long kaba sngewdei ban pynshai ba ka jingkyrpad ba la phah ka dei kaba la buh da ki nongmihkhmat jong ki kynhun ka Hindutva ban pyni bor pyrshah ïa ka jingbym ai jingbit jong ki pulit ka jylla ban shah ïa ki ba kin pynlong ïa ka jingïaid riewblei naba kum kane ka jingthmu ïaid paidbah la ai jingbit da ka kynhun bishar ha kawei pat ka jingphah jingkyrpad.
Kumba la ong da ki nongmudui la ong ba kane ka jingïaid paidbah kan long kaba jai jai ha kaba yn ym don kiba rah da ki tiar ïaleh, hynrei kan sa long tang ka jingïalum jong ki briew ha shi lynter jong ki lynti ïaid.
Kumba la sakhi, la ong ba kane ka jingkular ka la long da khongpong ha kaba ki la mih ki jingïakynad.
Kiba bun na ki kynhun jong seng ki bym dei na ka BJP ki ju pyrshah jur ïa ka Bajrang Dal ha kaba ki la kynnoh ba kane ka seng ka wanrah ki jingïapait hapoh ka ri bad hapdeng kiba bun ki kynhun.
Kum shi bynta ban sakhi halor kane, ka seng Congress, ha ki mat pyntreikam jong ka na ka bynta ka ilekshon Assembly ha Karnataka, ka la ong ba kan sa khang ïa ki seng kum ka Bajrang Dal bad PFI kiba ju pynsaphriang ïa ki khubor jong ka jingïashun hapdeng ki jait bynriew.
“Ka seng Congress ka la rai ban weng ïa ki jingeh bad shim ïa ka rai ban leh ei ei pyrshah ïa ki briew ne ïa ki seng kiba ju pynsaphriang ïa ki khubor jong ka jingïabuh shun hapdeng ki kynhun jaitbynriew ne ha ki niam. Ngi ngeit ha ka aiñ bad ha ka Riti synshar ha kaba la ong ba ym dei ban pynkheiñ da ki briew ne ki seng kumba leh ka Bajrang Dal, PFI ne kiwei pat kiba ju ïaleh ban wanrah bad pynsaphriang ïa ki khubor jong ka jingïashun hapdeng ki kynhun kiba khraw bad kiba rit paid. Ngin sa pynshitom da kaba tyngeh naba katkum ka aiñ la kynthup lang ha ka ban khang ïa kum kine ki jait seng,” la ong ka mat treikam jong ka seng.
Ha kaba ïadei bad kane, la ong ba ka sorkar kmie ka la dep ban khang ïa ka seng PFI.
Ka seng Congress ka la kular ruh ban weng noh ïa baroh ki aiñ ki bym ai jingmyntoi bad kumjuh kiba long pyrshah ïa ki aiñ jong ki briew ïa kiba la pdiang da ka sorkar BJP ha ka jylla hapoh shi snem lada ka wan ha ka bor synshar.
