Chandigarh, Naiwieng:
Ha ka jingai jingkren ha ka por ba la pynlong ïa ka “Jan Aakrosh” Rally ba la pynlong da u MLA jong ka Radaur MLA, u BL Saini, ha ka distrik ha ki khyndiat sngi ba la leit, u Myntri Rangbah barim jong ka Haryana u Bhupinder Singh Hooda u la ong ba u President jong ka seng Congress u Udai Bhan bad ma u kin sa leit ban jngoh ïa baroh 90 tylli ki Assembly konstitwensi jong ka jylla.
Ha ka jingïalang paidbah la ai jingkren da u Udai Bhan, u MP u Deepender Singh Hooda bad u lamphang barim jong ka Haryana Assembly, u Kuldeep Sharma. Napdeng kiba la ïadon bynta ha ka jingïalang paidbah la kynthup ruh ïa ki heh nongïalam jong ka seng u Raman Tyagi, Raj Kumar Tyagi, Satpal Kaushik, Brijpal Chhappar bad u Narsingh Pal.
Kum shi bynta ban kren shaphang ki nongrep pai, u Hooda u la pynshisha da kaba ong ba ka dor jong u Pai ka lah ban kiew tang ha ka dor kaba rit eh kata tang T. 450 shi kwintal lada jia ba ka seng Congress ka wan ha ka bor synshar ha ka jylla ha u snem ban wan.
“Kim ju don ki doktor ha ki Hospital, ym ju don nonghikai ha ki skul bad ki nongtrei ha ki jaka treikam,” u la pynshisha, ha kaba u la bynrap shuh shuh da kaba ong ba shano ka Haryana kan poi ha kane ka por ba synshar ka sorkar kaba mynta?
U Bhan u la pynshisha da kaba ong ba ha ka por ba synshar u Hooda, ka jylla ka la long kaba hakhmat eh ha kaba ïadei bad ka jingïohnong bad ka jingbei tyngka bad ki jingshah ktah jong ki jinglong jingman bad ka jingbym ïohkam-ïohjam jong ki briew ka duna bha.
Shuh shuh u la ong ba ha palat 9 snem, ïa ki kam bamsap na ka jylla la lah ban tehlakam.
Kum shi bynta ban thalaiñ tyngeh ïa ka sorkar kmie halor ka jingbym lah ban leh ei e ha kaba ïadei bad ki jingkular ba la khlei sha ki nongrep, u nongïalam jong ka seng Congress u Bhupinder Singh Hooda u la ong ba lada ka seng jong u ka wan ha ka bor synshar, baroh kine ki jingdkoh treikam kin sa urlong.
Kumba la ïakren ha ka por ba la don ka jingïalang jong ka seng Congress la ong ba lada ka seng ka wan ha ka bor synshar ha u 2024 ngin sa pyntreikam ïa ka MSP, ban thied ïa ki mar jong ki nongrep hapoh ka MSP bad ban ai jingmyntoi ïa ki nongrep.
Ha ka jingïakren bad ki nongthoh khubor, u Hooda u la ong ha kaba ïadei bad ka jingot ïa ka Subsidy ha ka dorbar mang tyngka 2023, ka jingmang ïa ka Pradhan Mantri’s Fasal Bima Yojana ka la duna na ka T. 15,500 klur sha ka T. 13,623 klur.
Ïa ka Pradhan Mantri Kisan Samman Nidhi ruh la pynduna na ka T. 68,000 klur sha ka T. 60,000 klur. Kiba bun kiwei pat ki Subsidy ha kaba ïadei bad ka Petrol, ka sboh dawai, ki jingbam, FCI, bad ki jingbam kiba hap hapoh ka jingtreikam jong ka Food Security Act, Market Intervention, bad ka TOP (Tomato, Onion, Potato Production) ruh la pynduna.
Kum ka jingai jingïaroh ïa ka sorkar kaba ha shwa, u Hooda u la ong ba ka sorkar Congress ha katei ka por ha Madhya Pradesh, Punjab, Chhattisgarh ka la lah ban map ïa ka ram jong ki nongrep da kumba T. 72,000 klur.
