Jaipur, Naiwieng:
U Myntri Rangbah jong ka Rajasthan u Ashok Gehlot hynnin ka sngi u la phah ïa ki kot pynrung kyrteng na Sardarpura konstitwensi kaba don ha Jodhpur distrik. Hynnin ka dei ka sngi kaba khatduh ban pynrung kyrteng na ka bynta ka jingïakhun ïa ka ilekshon Assembly ha Rajasthan. Ka Sardarpura ka la long ka jaka ba la bat da ka seng Congress bad u Gehlot u la jop ha baroh ki ilekshon ba u la ïakhun na ka konstitwensi naduh u snem 1998.
U Myntri Rangbah u la ïoh kumba 63 per cent ki Vote ha ka jingïakhun ïa ka ilekshon Assembly jong u 2018 ha kaba ka seng Congress ka la jop don burom pyrshah ïa ka seng BJP. Ka kurim jong u Myntri Rangbah ka Sunita Gehlot bad u khun jong u Vaibhav Gehlot ki la synran lang ïa u na ka bynta ka jingleit thep kyrteng. Hashwa ba un pynrung kyrteng, u Myntri Rangbah u la pdiang ka jingkyrkhu na ka hynmen jong u. Ha ka jingïakren bad ki nongthoh khubor, u Ashok Gehlot u la ong ba ka seng Congress kan sa ïoh ban bat biang ïa ka jingsynshar hapoh ka jylla. “Ki briew jong ka jylla ki la kwah ba ka sorkar hapoh ka jingïalam jong ka seng Congress kan bteng biang ïa ka jingsynshar ha Rajasthan,” la ong u Gehlot.
