Raipur, Naiwieng:
Uwei u shipai jong ka tnat Central Reserve Police Force (CRPF) u la mynsaw na ka jingbthei jong u bom IED (Improvised Explosive Device) ba la buh da ki lehnoh Maoist ha Sukma distrik jong ka Chhattisgarh, la ïathuh ki pulit.
Une u shipai uba la mynsaw u la shah pyntreikam na ka bynta ka ilekshon ha ka por ba u la shah thombor. Ka jingjia ka la jia hajan ki bynta jong ki khlaw kiba rben jong ka Tondamarka,ka thaiñ ha kaba ki lehnoh ki don. Haba la ïoh khubor ba la don ka kynhun jong ki lehoh ha katei ka jaka, ka kynhun jong ki shipai ka CRPF bad Commando Battalions for Resolute Action (CoBRA) 206th Battalion ki la pynlong da ka jingleit thwet lehnoh Tondamarka bad leit sha ka shnong Elmagunda khnang ban lah ban pyntikna ban buh jingshngaiñ ha kaba ïadei bad ka jingdon jong ka ilekshon, la ïathuh ka tyllong khubor kumba la kren da u heh pulit.
U Inspector Shrikant, uba long u dkhot jong ka kynhun CoBRA 206th Battalion, ha ka por ka bym poi pyrkhat u la ngat ha kane ka apot na ka jingbthei jong u bom IED ba la buh lypa da ki Maoist, ha kaba kane ka la pynmynsaw ïa u, la ïathuh ka tyllong khubor. Kane ka thaiñ ka hap hapoh ka Konta Assembly konstitwensi, kawei na ki 20 tylli ki konstitwensi ha kaba ïa ka ilekshon la pynlong hynnin ka nsgi jong ka bynta kaba nyngkong na ki ar tylli ki bynta jong ka ilekshon na ka bynta ban jied ïa 90 ngut ki dkhot jong ka Chhattisgarh Assembly.
Kiba bun na kine ki konstitwensi ki dei kiba hap hapoh ki thaiñ ba jur ki kam thombor jong ki lehnoh Maoist ha Bastar Division. Ki la don baroh kumba 5,304 tylli ki jaka thep vote ïa kiba la pyntreikam ha ka bynta kaba nyngkong jong ka ilekshon bad kumba 25,249 ngut ki pulit la pyntreikam na ka bynta ban pynjur ïa ka jingpahara.
Ka jingpynlong ïa ka ilekshon ha Mohla-Manpur, Antagarh, Bhanupratappur, Kanker, Keshkal, Kondagaon, Narayanpur, Dantewada, Bijapur bad Konta la pynlong naduh ka por 7 baje mynstep kumba la buh ba ka la long haduh ka por 3 baje janmiet namar ban ïada na ki kam pyntriem jong ki lehnoh. Ha kiwei pat ki 10 tylli ki konstitwensi kiba sah kiba kynthup ïa ka Khairgarh, Dongargarh, Rajnandgaon, Dongargaon, Khujji, Bastar, Jagdalpur, Chitrakot, Pandariya bad Kawardha, ki briew ki la thep vote naduh ka por 8 baje mynstep haduh ka por 5 baje mynmiet.
