Chennai, Naiwieng:
U Myntri Rangbah jong ka Tamil Nadu u MK Stalin ha ka Lah Sngi U Blei u la phah jingthoh sha u Myntri ka tnat korbar ri u S Jaishankar bad kyrpad ba un phah pyllait noh ïa ki 12 ngut ki nongtong dohkha kiba na Tamil Nadu ïa kiba la shahkem ha ki shipai duriaw ka Maldivian Coast Guard ha ka 22 tarik, Risaw.
Utei nongïalam jong ka seng DMK u la ong ruh ba ka lieng jong ki nongtong dohkha ka la shah rah halor ka jingkynnoh ba ka la rung beaiñ sha ki bynta jong ki um ha Maldives, katba ki dang tong dohkha ha ki bynta jong ka duriaw.
Kum shi bynta ban phai ha kaba ïadei bad ka jingshah daiñ kuna jong ka MVR 42,00,000, ha kaba la antad ba ka la long T. 2.25 klur, ba la pyntreikam pyrshah ïa ki nongñiah jong ka lieng tong dohkha, u Stalin u la thoh, “Ki heh ba dei khmih jong ka Maldives ki la pyntip ba ka la don ka jingdaiñ kuna ba la buh ban hap ban siew hapoh ki 30 sngi naduh ba la ïoh-pdiang ïa ka jingthoh bad kane ka lieng tong dohkha kan sa shah shimti noh ha ki shipai jong ka Maldives Police Force haduh ban da dep siew ïa ka kuna. “
Ïa kane ka kuna la pyntreikam naduh ka 1 tarik, Naiwieng, la ong u Myntri Rangbah jong ka TN.
“Nga buh ka jingkyrpad ba phin shim noh kham kloi ha kaba ïadei bad ka jingtuklar halor kane ha ka kyrteng jong kine ki nongtong dohkha bad ban phah map noh ïa ka kuna ba la dei ban siew da ka lieng tong dohkha,” la ong ka shithi. U MK Stalin u la pynpaw shuh shuh da kaba ong ba ki bahaïing jong kine ki nongtong dohkha ki la shu shaniah tang ha ki bad ki la long ki nongbsa-nongbtiah na ka bynta jong ki. Kane ka buh jingma na ka jingktah jur ïa ki bad kumjuh ïa ki bahaïing jong ki,” la pynshisha u MK Stalin.
“Nga buh ruh ka jingkyrpad ban pyntikna ha ka ban pyllait ïa ki nongtong dohkha ha ryngkat ka lieng tong dohkha jong ki. Nga shaniah skhem ba ka jingshimti jong u ban tuklar halor kane ka bynta kan sa ïarap ha ka ban phah pyllait ïa kine ki nongtong dohkha bad kumjuh ban ïarap ïa ki bahaïing jong ki, ha kaba mynta ki dang don hapdeng ka jingeh kaba khraw”, la ong shuh shuh u Stalin.
