Patna, Naiwieng:
Ki kynrum-kynram kaba la mih hapoh ka ïingdorbar ha Bihar hynnin ka sngi, hadien ki jingkren jong u Myntri Rangbah bad u nongïalam jong ka seng JD(U) u Nitish Kumar, ha kaba ïadei bad ka jingpynduna khun kaba u la ong ba la dei ban don ka jingai jinghikai sha ki longkmie na ka bynta kane.
Kine ki jingkren jong u Kumar ki la wanrah ïa ka jingïania bad ka jingïapher jingmut, naba la ong ba ka jingkren jong u ka la ktah ïa kiba bun ki longkmie naba ma u um mut ba kine ki ktah ïa kiwei pat.
Wat lada u la panmap bad shim noh sha lade ïa ki kyntien ba u la kren, pynban ki MLA na ka seng BJP ki la pynpaw ka jingpyrshah jur halor kane bad dawa ïa ka jinghiar shuki jong u.
Ha ka por ba la don ka dorbar, u Kumar u la ong ba u la kwah ban pynshai ha kaba ïadei bad ki jingkren jong u halor ka jingtehlakam ha ka jingpynbun briew.
Haba u la panmap hapoh ïingdorbar, ki MLA jong ka seng BJP ki la pyrta da ki sur bajam ban dawa phah hiar shuki ïa u Kumar.
Ha ka por ba u Kumar u la panmap, u la ong,” Ki jingkren jong nga ki la shah pynsngewthuh bakla. Nga la kren tang shaphang ka jingai jinghikai ïa ki longkmie kumno ba kin lah ban pynduna khun. Nga panmap lada ki kyntien jong nga ki la ktah ïano ïano,” u la ong.
U Myntri Rangbah u la kren ïa kine ki kyntien ha ka sngi Ba-ar katba u dang ai jingmut kumno ban ai ïa ki jinghikai bad ban pynsngewthuh sha ki longkmie kumno ba kin khmih bniah halor ka jingbun briew bad ba kumno ka kha ka pun ha Bihar ka la hiar na ka 4.2 sha ka 2.9 per cent.
Hynnin ka sngi, u Kumar u la kyntait ban rung hapoh ïingdorbar ha ka por ba dang don ka jingïakhih pyrshah jong ki MLA ka seng BJP.
Hadien kane u la rung hapoh bad ong ba ïa ki jingkren jong u la shu pynsngewthuh bakla, ha kaba u la pynshai da kaba ong ba ka jingkren jong u ka thmu ban pynïoh jinghikai sha ki longkmie halor ka pun ka kha.
