Lucknow, Naiwieng:
Khyndiat sngi hadien ka jingïakhun ban ïoh ïa ki konstitwensi bad ka seng Congress na ka bynta ka jingïabhah ïa ki Assembly konstitwensi ha Madhya Pradesh, u heh nongïalam jong ka seng Samajwadi Party u Akhilesh Yadav u la wer na ka bynta ban thaw da ka kynhun ka liang pyrshah kaba thymmai ka PDA.
U la ong ba ka PDA kan sa khmih bniah na ka bynta kito ki kynhun kiba dang sahdien bad ki Dalit. Kane ka la long hapdeng ka por ba la don ka jingïapher jingmut hapdeng ka seng SP bad ka seng Congress hapoh ka kynhun synrop INDIA.
Kumba la ïathuh ka tyllong khubor, la ong ba ha ka por ba la pynlong ïa ka jingïalang paidbah ha ka Lah Sngi U Blei, u Myntri Rangbah barim jong ka Uttar Pradesh u la kynthoh jur ïa ka seng BJP bad ïa ka seng kaba la ju ïatreilang hashwa, kata ka seng Congress, bad pynpaw ka jingkyrmen ba kine baroh ar tylli ki seng kin sa shah rem ha ka kynhun ba la ïatreilang jong ki seng kiba rit hapoh ka kynhun PDA ka ban long ka shatri jong ki seng na ka bynta ka jingïakhun ïa ka ilekshon Lok Sabha 2024.
“Ka ri ka donkam noh ïa ki jingthmu pyntreikam kiba thymmai, ïa ka seng kaba thymmai bad kumjuh ïa ka kynhun synrop kaba thymmai. Ngi kyrmen skhem ba ka kynhun PDA kan thaw ïa ka kynhun synrop kaba thymmai bad baroh ar kata ka NDA bad ka Congress kin sa rem,” la ong u Akhilesh Yadav ha ka jingïalang paidbah kaba la long ha Damoh kaba don ha Madhya Pradesh kumba la ïathuh ki lad phah khubor.
