New Delhi, Naiwieng:
Ka Municipal Corporation of Gurugram (MCG) ka la pynlong ïa ka jingïalap ban pynsngewthuh paidbah na ka bynta ban ai jinghikai ïa ki briew shaphang ka jingpyndonkam ïa ki tiar bad ki pla plastik ïa kiba la khang naduh ka 1 tarik, Naitung, jong u snem 2022 la ïathuh ki heh ba dei khmih.
Kumba la sakhi ha ka ri, la ong ba ki la don bun tylli ki shnong bad ki nongbah kiba la lah ban ïakhun hi dalade na ka bynta ban sangeh ha ka ban pyndonkam ïa ki plastik.
Ha kaba ïadei bad kane ka bynta, ki heh ba dei khmih ki la kyntu ïa ki briew ba ki dei ban ïashim bynta ha ka jingïalang paidbah kaba long halor ka jingpynsngewthuh na ka bynta ka jingpyndonkam ïa ki plastik.
Ka la don ka jingkyrpad ïa ki briew ba ki dei ban rah da ki pla borni, ki pla jaiñ lada ki donkam ban leit sha ïew.
Ha kaba ïadei bad kum kane kajuh ka jingthmu ka Vijayawada Municipal Corporation (VMC) ka la ïaid shakhmat ha kaba ïadei bad ka jingthmu ban wanrah ïa ka jingkylla ïa ka Gandhi Hill sha ka jaka kaba lait na ka jingpyndonkam ïa ki plastik.
Ha kaba ïadei bad kane ka bynta, ka Civic Body da ka jingkyrshan jong ki dkhot jong ka Gandhi Hill Foundation Committee bad ki shipai pahara kin sa lah ban pynlong ïa ki jingpynbna sha ki paidbah.
Katkum ka jingïathuh jong ki heh ka VMC, ka Civic Body ka la soi ïa ka Memorandum of Understanding (MoU) bad ka Gandhi Hill Foundation ha u 2020 na ka bynta ban kyntiew ïa kane ka jaka.
Nalor ka jingpruidur ha kaba ïadei bad ka jingthmu da ka Corporation, ïa ki lynti synkien bad kiwei pat ki jingdonkam la nang pynbiang shuh shuh ha ka jinglut ba la antad ba kan long T. 2 klur.
Kane ka jingmang pisa ka kynthup ruh na ka bynta ban pynitynnad ïa katei ka thaiñ ha ka rukom kaba ishongkun bad khring ïa kiba bun.
U Commissioner jong ka VMC u Swapnil Dinakar Pundkar u la ong ba da ki phew snem, ka Gandhi Hill kaba la paw ha ka khana pateng ka la long ka jaka kaba la khring ïa ki nongjngohkai pyrthei na kylleng ki ri ka pyrthei.
Na ka jingbuh jingkheiñ la ong ba ki ju don kumba 1,000 haduh 1,500 ngut hama ki sngi ki briew kiba ju leit shangkai sha kane ka thaiñ bad ka la long arshah ha ki sngi kut taïew.
Kum ka jingbuh jingmut ha kaba ïadei bad kane, ka Civic Body kan sa shim ki sienjam na ka bynta ban pynkylla ïa kane ka jaka sha ka jaka kaba lait na ka jingpyndonkam plastik, la ong u heh jong ka VMC.
Na ka bynta ka jingpyrshang ban lah ban khang ha ka ban pyndonkam plastik ha baroh kawei ka ri, ka sorkar kmie ka la khang noh ha ka ban pynmih, ban pynpoi, ban buh, ban sam, ban die bad ban pyndonkam ïa ki tiar ba la shah kynthup hapoh ka ‘Single-Use-Plastic’ (SUP).
