Bengaluru, Naiwieng:
Ki heh nongïalam jong ka seng Bharatiya Janata Party (BJP) ki la dei ban pynlong ïa ka jingïalang bad ban ai ïa ka rai kaba khatduh na ka bynta ban jied ïa ki kyrteng jong u nongïalam jong ka liang pyrshah ha Karnataka ha ka 17 tarik, Naiwieng, khyndiat sngi hadien ka jingthung ïa u BY Vijayendra, uba long u khun jong u Myntri Rangbah barim jong ka jylla u BS Yediyurappa, kum u heh nongïalam jong ka seng ha ka jylla.
“Nga la ïakren bad u Nadda ha ka sngi Thohdieng. Ngi la wer ïa baroh ki MLA ba kin ïadon bynta ha ka jingïalang ka ban sa long ha katei ka sngi na ka bynta ban ai ïa ka rai ban jied ïa u nongïalam ka liang pyrshah na ka seng,” la ong u heh nongïalam bathymmai jong ka seng uba dang shahjied shen u Vijayendra, ha ka jingïakren bad ki nongthoh khubor ha ka sngi Saitjaiñ.
Ka kynhun jong ki nongïalam bahakhliehduh kin sa pynbna ïa ka kyrteng jong u nongïalam ka liang pyrshah ha katei hi ka sngi. Kumba la ïathuh ka tyllong khubor, la ong ba ki la don kumba lai ngut ki heh nongïalam kiba la mih khmat ban shahjied na ka bynta kane ka shuki. Kine ki kynthup ïa u Sunil Kumar uba la 47 snem ka rta uba dei na ka kynhun Other Backward Classes (OBC) bad uba la long MLA la saw sien, u CN Ashwathnarayan 55 snem ka rta, uba la ïoh long MLA la saw sien na ka kynhun Vokkaliga bad u R Ashok uba la 66 snem na Padhmanabhanagar, uba la long MLA la 7 sien na ka kynhun Vokkaliga.
