Amaravati, Naiwieng:
U Myntri Rangbah jong ka Andhra Pradesh u Y.S. Jagan Mohan Reddy u la ong ba ka jingsam ïa ka bailutksan kaba T. 10,000 yn sa pynïoh sha baroh ki lanot kiba la shah ktah jur na ka jingshah pynjulor ki ïing na ka daw jong ka jingshlei ka um na ka wah Godavari.
Ka sorkar kan sa pynthikna ba ki tiar ba la noh synñiang kum ki jingïarap kin sa poi sha ki lanot ha ki thaiñ ba la shah ktah jur na ka jingshlei um, u la ong.
U Myntri Rangbah u la leit ban jurip bniah ïa ki shnong kiba la ngat ha ka jingshlei um bad buh jingkylli kaba bniah ha kaba ïadei bad ki rukom pyntreikam ha ka ban ai jingïarap.
Ki nongshong shnong ha kane ka thaiñ kham hashwa ki la ïathuh ha utei Myntri Rangbah ba ki la ïoh ban pdiang ïa u khaw 25 kilo, dai, ki dawai, ka dud, ki jhur, ki jingbam, ka umdih bad ki plastik dara ha ka por ba ki la ïakynduh jingeh na ka jingshlei um.
Ki lanot shlei um, ha kaba ïadei bad kane, ki la pynpaw ka jingsngew-nguh ïa u Myntri Rangbah uba la ai ka jingïarap na ka bynta jong ki ha kum katei ka por ba ki ïakynduh jingeh.
Ki nongshong shnong ki la ïathuh shuh shuh ha u Jagan Mohan Reddy ba u MLA ka Polavaram u Tellam Balaraju, u Collector V. Prasanna Venkatesh, u Joint Collector P. Arun Babu bad kiwei pat ki heh sorkar ki la leit ban jurip bniah ïa ki jaka sah jong ki bad u Myntri Rangbah u la ai ka jingïaroh ïa kine ki heh sorkar kiba la kloi ban khmih bniah bad kyrshan ïa ki lanot shlei um ha kaba ka jingpyntreikam ka dang bteng haduh mynta naba bun na ki lanot kim pat ïohpdiang ïa ki jingïarap pisa kumba la mang na ka bynta jong ki.
Ki lanot shlei um ki la pynpaw ka jingsngewnguh ïa u Myntri Rangbah uba la kloi ban ai jingïarap na ka bynta jong ki ha kaba ki la lah ban im kumba ki long mynta dei na ka daw ka jingai jingkyrshan jong ka sorkar.
Ki riewlum kiba la sah ha ki ïing dara ha ki jaka lum ruh ki la pynpaw ka jingsngewnguh ïa u Myntri Rangbah uba la kloi ban ai jingïarap na ka bynta jong ki ha ka por ba ki ïakynduh jingeh na ka jingshlei um.
Ki la pynpaw ka jingsngewnguh ïa u Reddy na ka bynta ka jingleit jngoh jong u ïa kine ki jaka bad u la kylli tohkit bha ha kaba ïadei bad ki jingïoh jingmyntoi jong ki khyndiat sngi ba la jia ka jingshah thombor ha ki bor ka mariang.
“Ïa ki jingwad bniah ha kaba ïadei bad ka jingdon jong ki jingjulor jong ki ïing bad ki jingthung la dep ban pyndep ha kaba na ka liang ka sorkar ka la dep ban sngap thuh ïa ka jingbatai hadien ka jingpyntreikam bad ïa ki jingai jingïarap la phah sha ki Collector kiba dei ban khmih ïa ki thaiñ ha kaba kine kin sa phah ïa ki jingai jingïarap sha ki lanot. Ka thup kyrteng jong ki lanot kiba la shah ktah na kane ka jingshlei um la dep ban buh ha ka shnong bad kumjuh ha ki Ward Secretariat,” la ong u Myntri Rangbah ha kaba u la bthah ïa ki bor ba dei khmih ba ki la dei ban pynpoi ïa ki jingïarap bala phah sha baroh ki lanot kiba la shah ktah na ka jingshlei um.
