Bengaluru, Naiwieng:
Hyderabad: Na ka jingpynshisha halor ka jingdon ïa ka spah kaba palat T. 600 klur, u kyrtong jong ka seng Congress na Chennur u G Vivekananda u la paw ba u la long u riewsaiñ pyrthei uba riewspah tam napdeng ki kyrtong ki ban ïakhun ha ka ilekshon Assembly ha ka 30 tarik, Naiwieng, uba bud u dei u P Srinivas Reddy na kajuh hi ka seng ha kaba u la don ïa ka spah kaba T. 460 klur.
U Vivek bad ka kurim jong u ki la long trai ïa ki jingdon jingem kiba lah ban pynkhih kiba la kot sha ka T. 377 klur, naba kaba bun ka la long ha ka jingpynleit sha kiba bun ki kompeni kynthup ïa ka jong u kaba dei ka Visaka Industries kaba la seng naduh u snem 1981.
Ka spah ka bymlah pynkhih jong kane ka longïing ka la long da palat T. 225 klur.
Katkum ka jingpynshisha kaba u la phah, u Vivek bad ka kurim jong u ki la don ïa ka spah kaba long katkum ka aiñ ne ka Loan kaba la kot sha ka T. 41.5 klur.
Ka jingkamai spah jong u Vivek kaba man u snem ka la kiew sha ka T. 6.26 klur ha ka snem jong ka kheiñ ka diah jong u snem ba la lah.
U P Srinivas Reddy uba la ïakhun na Palair Assembly konstitwensi u la pynshisha ba ka jingdon spah jong u ka la kiew sha ka T. 460 klur, kiba long ha baroh ar, kata ki bym lah ban pynkhih bad kiba lah ban pynkhih, ha kaba u la don da T. 44 klur ka spah kaba long katkum ka aiñ.
Sa uwei pat u kyrtong jong ka seng Congress u Raj Gopal Reddy u la pynshisha ba ka jingkamai spah jong u hapdeng u snem 2022-23 ka la kiew sha ka T. 71.17 klur na ka T. 36.6 lak ha u snem ka kheiñ ka diah jong u snem 2019.
U kyrtong jong ka seng Congress na Munugode u la don ïa ka spah kaba T. 1.24 klur kiba la long ha ka kompani Sushee Infra bad ka Mining Ltd.
U kyrtong jong ka seng BRS u Pailla Shekar Reddy u la don ïa ka spah kaba T. 227 klur, u Myntri Rangbah jong ka Telangana u K Chandrasekhar Rao u la pynbna ïa ka jingdon spah jong u kaba lajan T. 59 klur.
Ki la don baroh kumba 4,798 ngut ki kyrtong na ki seng bapher bapher kiba la phah ïa ki jingpynrung kyrteng da 5,716 tylli na ki 119 tylli ki Assembly konstitwensi ha Telangana.
