Chennai, Naiwieng:
Ka jinghap jong u slap ba jur kaba la ktah ïa ki bynta ba bun jong ka Tamil Nadu ka la pynlong ïa ki heh ba dei khmih ba kin khang shwa ïa ki skul kiba don ha Cuddalore, Mayiladuthurai, bad Villupuram distrik jong katei jylla.
Ka Puducherry ruh ka la ai shuti ïa ki skul bad ki kolej hynnin ka sngi. Kane ka jingpynbna ka long hadien ba ka Meteorological Department ka la dep ban ïathuh lypa ïa ka jinghap jong u slap uba jur ha kiba bun ki bynta jong ki distrik, kynthup ïa ka Chengalpattu, Kancheepuram, Villupuram, Cuddalore, bad Puducherry kaba la long hynnin ka sngi.
Ka India Meteorological Department (IMD) ha ka lah sngi U Blei ka la buh ka jingmaham ïa kiba bun ki bynta kiba lah ban shah ktah na ka jinghap jong u slap uba jur ha ki thaiñ kiba don ha ki rud duriaw jong ka Tamil Nadu, Puducherry, bad Karaikal. Ka tnat IMD ka la buh jingmaham lypa ha ka rynsan phah khubor ka X, ïa kaba hashwa la tip kum ka Twitter ha kaba ka la ong, “Ba la dei ban long kiba husiar namar ka jingwan hap jong u slap uba jur. Ki thaiñ kiba don harud nong jong ka Tamil Nadu, Puducherry, bad ka Karaikal kin sa ïohmad ïa ka jinghap jong u slap uba jur haduh kumba (115.6 to 204.4 mm) ha ka 13 tarik, Naiwieng bad ka 14 tarik, Naiwieng.”
Ka la buh jingmaham ruh ha kaba ïadei bad ka jingwan jong ka lyer kaba jur ka ban stet ka jingbeh haduh 55 km ha ka shi kynta. Haduh ka taïew ba la lah, ka Tamil Nadu ka la ïoh ïa ka jinghap slap kaba 17 per cent kaba duna na kaba dei ban long.
Kumba la ïathuh lypa, la ong ba ka jinghap jong u slap uba jur kan sa long ha ki bynta rudnong jong ka Cuddalore, Villupuram, Chengalpattu, bad Kancheepuram distrik jong ka Tamil Nadu bad Puducherry.
Ka jinghap jong u slap uba jur kan sa long ruh ha ki bynta ba bun kiba kynthup ïa ka Tirupattur, Vellore, Ranipet, Tiruvallur, Chennai, Tiruvannamalai, Kallakurichi, Perambalur, Ariyalur, Tiruchirappalli, Pudukkottai, Thanjavur, Tiruvarur, Nagapattinam, Mayiladuthurai distrik jong ka Tamil Nadu, bad ka thaiñ Karaikal, la ïathuh ka tnat IMD ha ka jingïakren bad ki nongthoh khubor.
