Thiruvananthapuram:
Ka kynhun nongbishar kaba kynthup ïa ki lai ngut ki dkhot jong ka Kerala Lokayukta ha ka Lah Sngi U Blei ki la kyntait ïa ka jingmudui mukotduma kaba long pyrshah ïa u Myntri Rangbah u Pinarayi Vijayan bad ïa kiwei pat halor ka jingshah kynnoh ba ki la donkti ha ka ban kamai beaiñ ïa ka spah na ka Chief Minister’s Distress Relief Fund (CMDRF) ha ka por ba la synshar da ka kynhun Left Democratic Front (LDF). Ka jingïatai nia halor kane ka mukotduma ka dang don ha ka kynhun jong ki riewsaiñ pyrthei naba ka kynhun ba ju ïakhun pyrshah halor ka kam bamsap ka la lah ban pyndep ïa ka jingbishar bniah halor kane naduh u Lber jong u snem ba la lah.
Ha u bnai Ïaïong jong une u snem, ka Lokayukta ka la rah noh ïa kane ka bynta sha ka kynhun jong ki lai ngut ki dkhot na ka bynta ban ai ïa ka rai kaba khatduh halor kane, naba ki la don ki jingïapher jingmut hapdeng arngut ki nongbishar jong ka kynhun ba dei tohkit.
Ha u snem 2018, u R S Sasikumar, uba long u dkhot barim jong ka Syndicate jong ka Kerala University, u la buh ka jingmudui pyrshah ïa u Vijayan bad ïa ki 17 ngut ki dkhot jong ka kynhun Cabinet ha katei ka por halor ka jingkynnoh ba ki la pyndonkam bakla ïa ka CMDRF.
