Ranchi, Naiwieng:
U Myntri Rangbahduh u Narendra Modi un sa pyllait bad pyntreikam ïa ka skhim kaba T. 24,000 klur halor ka jingthmu pyntreikam ïa ka Particularly Vulnerable Tribal Groups (PVTG) ha ka sngi ban rakhe ïa ka ‘Janjatiya Gaurav Divas’ ha ka 15 tarik, Naiwieng kata mynta ka sngi ha Jharkhand, la ïathuh ka shlem treikam jong u ha ka Lah Sngi U Blei.
Nalor nangta un sa plie paidbah ruh ïa ka ‘Viksit Bharat Sankalp Yatra ban pyllait ïa ka jingsiew kaba 15 jong ka PM-KISAN, un sa plie bad buh ruh ïa u mawnongrim jong kiba bun ki Project ha ka jylla.
Kumba la mut lypa, la ong ba u Modi mynta ka sngi, ka 15 tarik, un sa leit jngoh ïa ka Bhagwan Birsa Munda Memorial Park cum Freedom Fighter Museum ha Ranchi.
Hadien kane un sa leit sha ka shnong Ulihatu Village, kaba dei ka jaka ba la kha ïa u Bhagwan Birsa Munda, ha kaba un sa leit buh syntiew ha u durmot jong u Bhagwan Birsa Munda.
U Modi un sa long u Myntri Rangbahduh uba nyngkong eh ban sa leit jngoh ïa ka shnong Ulihatu kaba dei ka jaka ba la kha ïa u Bhagwan Birsa Munda, la ong ka jingthoh ba la phah na ka jaka treikam jong u Myntri Rangbahduh.
