Chennai, Naiwieng:
Ka sorkar kmie kum shi bynta ban weng ïa ki jingeh ba bun jong ki briew ki baduk ha kaba ïadei bad ka ïoh ka kot bad ban pyntikna ha kaba ïadei bad ka jingpyndonkam ryntih ïa National Food Security Act (2013) ka la pynbiang ei da ki jingbam khlem donkam ban siew sha ki longïing kiba shah kynthup ha ka Antyodaya Anna Yojana (AAY) bad Priority Households (PHH) kiba dei ban ïoh jingmyntoi hapoh ka jingtreikam jong ka Pradhan Mantri Garib Kalyan Anna Yojana (PMGKAY), na ka bynta shi snem kaba la sdang naduh ka 1 tarik, Kyllalyngkot.
Ka jingtreikam jong kane ka skhim ka la long sha palat 80 klur ngut ki briew ha kaba ka la ïai bteng haduh mynta.
Ïa kane ka rai la shim kum shi bynta ban pynkhlaiñ ïa ki jingpyntreikam jong ka National Food Security Act, 2013 (NFSA) na ka bynta ban pynïoh jingbam ei sha ki briew ki baduk hapoh ka jingtreikam ryntih jong ka National Food Security Act 2013 (ONE NATION- ONE PRICE -ONE RATION).
Kumta ka sorkar kmie ka la bahkhlieh na ka bynta ban wanrah ki jingpyntoi da kaba pynïoh, pynbiang, mang bad phah ïa ka jingbam rashon ba bun jait ha ki jaka ba la buh ha ki jylla da ka jingïarap jong ar tylli ki skhim ai jingmyntoi sha ki jylla kiba la tip kum ka Food Subsidy sha FCI bad Food Subsidy sha Decentralized Procurement (DCP).
Kine ki ar tylli ki Food Subsidy Scheme ki la shah kynthup ha ka Pradhan Mantri Garib Kalyan Anna Yojana (PMGKAY) na ka bynta ban pyntreikam ryntih hapoh ka National Food Security Act, 2013 khnang ban lah ban pynkhlaiñ ïa ka jingtreikam jong ka Food Security ha ka ri.
Hapoh ka jingtreikam jong kane ka skhim, ka jingsam ei ïa ki jingbam rashon la sam lyngba ka Targeted Public Distribution System (TPDS) naduh ka 1 tarik, Kyllalyngkot, 2023.
