Chennai, Naiwieng:
Ki la don kumba 14 ngut ki nongïakhih kynthup ïa ka nongïaleh ban pynïoh ïa ka hok ki paidbah, ka Aruna Roy, ha ka sngi Ba-ar kiba la buh da ka jingkyrpad ïa u Myntri Rangbah u MK Stalin ba u la dei ban pyllait noh ïa ki nongrep kiba la shahkem ha Tamil Nadu. Kane ka jingkyrpad ka la long hadien ba ki la don kumba 20 ngut ki nongrep, kynthup kiba bun kiwei pat kiba la pynpaw ka jingpyrshah jur halor ka jingthmu ban thied ïa ki jaka rep na ka bynta ban pyntreikam ïa ka Industrial Project ba la shim da ka SIPCOT (State Industries Promotion Corporation of Tamil Nadu Limited kaba dei ka nongkyrshan jong ka sorkar kaba la kyntiew ïa ka jingbei tyngka) ha Tiruvannamalai distrik kiba la shahkem ha basdang une u bnai.
Katkum ka jingïathuh jong ki nongïakhih, la ong ba kane ka Project kan sa ktah ïa kumba 3,000 akar ki jaka rep kiba don ha kylleng ki 9 tylli ki shnong, ha kaba ki nongrep ki ju rep na ka bynta bun snem ha kaba la thmu ban aiwai sha ka kompeni jong ki riewshimet.
“Ngi da pynrem jur halor kane ka jingleh jong ka sorkar Tamil Nadu bad ïa ki pulit jong ka kiba la kem bad set ïa ki nongrep kiba la pynlong ïa ka jingïakhih,” la ong ka Aruna Roy jong ka Mazdoor Kisan Shakti Sangathan ha ka jingthoh ba ka la phah.
“Ngi la tip ba ki la pynlong da ka jingïakhih kaba jai-jai ha kaba ki la pyrshah halor ka jingthmu pyntreikam ïa ki kot dulir jong ki na ka bynta ban shah thied ki jaka rep kaba la long da palat 100 sngi bad pyrshah jur halor ka jingthmu pyntreikam jong ka sorkar,” ka la bynrap.
