New Delhi, Naiwieng:
Ka Aam Aadmi Party (AAP) ha ka Sngi Palei ka la buh da ka jingmudui sha ka Election Commission (EC) of India pyrshah ïa ka seng Bharatiya Janata Party halor ka jingpynkheiñ jong ka ïa ki kyndon kiba shah kynthup hapoh ka Electoral Law, Representation of Peoples Act, 1951 bad Model Code of Conduct.
Katkum ka jingmudui ba la phah sha ka EC, ka AAP ka la kynnoh ba ka BJP ka la buh ïa kiba bun ki khubor lamler ha kaba ïadei bad ka jingthmu ban pynthohbria ïa ka AAP kaba la long lyngba ki dur bad ki Video ha ki lad phah khubor ha kaba kane ka long ban pynthohbria ïa u Myntri Rangbah jong ka Delhi u Arvind Kejriwal uba la long u nongïalap ilekshon uba hakhmat eh na ka bynta ka seng ha ki jylla kum ha Rajasthan, Madhya Pradesh, Chhattisgarh, bad Mizoram ha kaba ki la pynlong ïa ka ilekshon.
Ha ka jingphah jingmudui, ka seng AAP ka la pynshisha da kaba ong ba ka BJP na ka por sha ka por ka ju pynthohbria ïa u Kejriwal bad ïa kiwei pat ki dkhot jong ka AAP bad ka la ju kynnoh bymhok pyrshah ïa ki tang ban pynkulmar jingmut bad pynlong ïa ki paidbah ba kin isih ïa ka seng.
Kum shi bynta ban kynthoh jur ïa ka BJP, ka AAP ha ka jingmudui ka la ong ba ka BJP ka la pyndonkam bakla ïa ki lad phah khubor.
U nongïalam jong ka seng AAP bad u MP u Raghav Chadha u la kynnoh ba ka BJP ka la pynlong ïa ka jingïalap paidbah ha ki lad phah khubor tang kumno ban ïoh ban pynthohbria ïa u Kejriwal.
