U Bah Adelbert Nongrum, uba long u MLA ka Voice of the People Party (VPP) na North-Shillong, u la pynkynmaw ïa ki por ki snem ba la leit noh ha kaba la mih ka jingkheiñ ba 184 tylli ki longïing yn pynkynriah na Them Ïew Mawlong sha ka shlem jong ka Shillong Municipal Board – 128 ki dei na Municipal bad 56 na kiwei-kiwei ki tnad treikam. Ha kajuh ka por, u la pynpaw ka jinglyngngoh halor ka jingmih ki 342 tylli ki longïing, kata sa 158 tylli na ka 184 tylli kaba ka sorkar kan sa ai jaka na bynta jong ki. Lah ban kdew ba ha ka jingïalang ba dang shen jong ka High-Level Committee (HLC), la rai ban ai sa 1.4 akar ka jaka hajan jong ka shlem Shillong Municipal Board sha ki longïing longsem ki ban mih na Them Ïew Mawlong. Kane ka 1.4 akar ka jaka ka dei nalor ka 2.14 akar kaba la dep mynjur lypa mynshwa ban ai. Baroh ka jaka ka long 3.54 akar lane 1,54,202.4 ‘Square Feet’.
Nalor jong u Bah Adelbert, na ka liang ka VPP ruh ka la pyrshah jur ïa ki sienjam ba la shim da ka sorkar Meghalaya Democratic Alliance (MDA) ban ai ei ïa ka jaka kaba heh haduh 1.4 akar hapdeng ka sor Shillong nalor ka 2.14 akar kaba la don lypa ban pynsah ïa ki briew na Them Ïew Mawlong ha kaba bun na ki, ki la dei lypa kiba sah be-aiñ ha ka jaka sorkar. Watla kane ka seng kam don jingujor eiei lada ai jaka sah ïa ki nongtrei sorkar kiba dei hok ban sah ha ki ïingsah jong ka sorkar katba ki dang trei ha ka kam, ka VPP ka la pynpaw pat ba ka jingai jaka sha kitei ki ’riew paidbah ka long ka bym lah ban pei phang namar ka long shabar na u pud jong ka aiñ bad kam don jingpynshai kaba thikna na ka liang ka sorkar halor kane ka bynta. Kane ka seng ka la ther ïa ka sorkar ba ha ki por ba la leit ka la dep rai ban ym ai ïa kino-kino ki jaka Sorkar sha ki ’riewshimet, hynrei mynta ka kynti pat ka jingshim jong ka sorkar ïa kane ka rai kaba long da khongpong ïa kaei kaba ka la dep rai teng. Ka VPP ka la kdew ruh ba ka sorkar MDA ka dei ban pyni nuksa hangno ka ju ai ïa ki jaka sorkar sha ki briew jong ka jylla – kiba duk bad ki bym don jaka puta kumjuh kiba donkam ban ïoh la ka jaka sah.
Ka long ka jingshisha ba ha ki jaka sorkar, dei ban sah barabor tang ki briew jong ka sorkar kaba mut kiba trei ha ki kam sorkar bad ynda ki la kut ka samoi treikam, ki dei ban mih noh khnang ban ïoh sah da kiwei pat kiba dang don ha ka kam. Barabor, ka sorkar kam ju ai jaka ïa ki ’riew shimet. Ha kaba ïadei bad kita ki 342 tylli ki longïing kiba la ïoh jaka ban sah ha ka khyndew ka Shillong Municipal Board, ka sorkar ka dei ban pynbna ïar ïa ki kyrteng bad ka jaka trei jaka ktah jong ki khnang ba ki paidbah kin tip bad lada don ki nongujor ruh, ka sorkar kan tip. Na kine ki 342 tylli ki longïing, wat tang kawei ruh kam dei ban long kaba be-aiñ ne ka bym dei hok ban ïoh jaka ban shong ha ka khyndew jong ka sorkar. Namarkata, ban khuid bad ban shai, ka sorkar ka dei ban pynbna ïa ki kyrteng jong kine ki longïing bad mano kiba trei ha ki shlem sorkar. Ïa kane, kiwei ki seng bad kynhun ki dei ban dawa khnang ban ïa shai naduh ba sdang.
Sngewsynei pat ïa ki trai ri ki trai muluk ki bym don ki nongïasaid na ka bynta jong ki ban ïoh jaka ban thaw tang shi nongrim ïing. Ka jingjyllei ki baduk ka pynsuk ïa ki heh spah ha ka por ilekshon namar kiba bun na ki, ym baroh, kim banse ban ïa kner ïa ka pisa hashwa ban rai ïano kin ai jingkyrshan. Kam dei kaba suk ban kyrngah ïa ka pisa haba la wan tyrwa haduh tyngkong ïing. Kiba don ba em ki lah ban bishar ïa ki duk ki suk ha kiba bun rukom. Tangba dei tang kiba phong juti ki sngewthuh u prek u thar naei. Namarkata, hashwa ban beiñ ïano-ïano, dei ban tip bha shwa ïa ka tynrai bad ki daw balei ki leh kumto. Ka long kaba sngewsangsot ban ïohi ïa ki para trai ri trai muluk ban im khlem ïing khlem sem bad khlem jaka puta ban shna shi nongrim ïing. Lada kawei ka pateng kam don nongrim ïing, kan bud pat sa ha kawei ka pateng bad kan ym kut shuh namar kat nang mih ki snem, ka dor jong ka khyndew ka la nang kiew.
