New Delhi, Lber:
Ka National Investigation Agency (NIA) ka la pynbna da ka buskit kaba mar T. 10 lak lada ai jingtip ban ïoh kem ïa ar ngut ki briew kiba la shah suba donkti ha ka jingpynbthei bom ha Rameshwaram Cafe ha Bengaluru.
Ka kynhun tohkit ka la pan jingïarap na ki ‘riewpaidbah ban lap ïa u Mussavir Hussain Shazib ba la tip ruh da ka kyrteng kum u Shazeb bad u Abdul Matheen Ahmed Taahaa ba la tip ruh da ka kyrteng kum u Abdul Matheen Taha, ïa kiba la shah thwet ha kaba ïadei bad ka jingjia. Kane ka jingpynbna ka la long haba ka kynhun NIA ka la ïoh ban kem ïa u Muzammil Shareef, uba long u snar nongïalam ha ka jingpynbthei bom.
Na ka jingpynlong ïa ka jingtohkit la tip ba u Shareef u la phla halor ki kam ba sha lyndet jong kane ka jingjia ha kaba kane ka la pynlap ksai halor ka jingdonkti sa kine ki arngut ha kaba ka kynhun ka la pynlong ïa ka jingthwet kaba jur ban ïohkem ïa ki, kine ki la donkti ha ka ban pynbthei da u bom IED ha ka jaka bam kaba don ha ITPL Road, Brookefield, Bengaluru, ha ka jingjia kaba la jia ha ka 1 tarik, Lber. Kane ka jingbthei bom ka la pynmynsaw ïa bun ngut ki briew kiba don ha katei ka jaka.
