Kolkata, ïaïong:
Ki la don kumba san ngut ki briew kynthup ïa kawei ka longkmie ki la ïap bad kumba 500 ngut kiwei pat ki la mynsaw, katba kiba bun ki ïing ki la shah pynjulor na ka jingkhie ka ‘erïong ha ki ar tylli ki jaka kiba don ha Jalpaiguri distrik jong ka bynta ba shaphang Shatei jong ka West Bengal kaba la jia ha ka por shiteng sngi jong ka Sngi U Blei.
Ka Myntri Rangbah jong ka jylla ka Mamata Banerjee ka la pynpep noh ïa ki prokram kiba la dei ban pynlong bad leit sha Jalpaiguri Super Specialty Hospital ban leit jngoh ïa ki briew kiba la mynsaw na ka jingkhie ka ‘erïong. Ka ‘erïong ka la synllad ïa kiba bun ki shnong ha ka por 3.30 janmiet jong kane ka sngi bad ka la neh da kumba 10 minit.
Ha ka jingïakren bad ki nongthoh khubor, ka Mamata Banerjee ka la ong ba kane ka jingthombor jong ka mariang ka la pynjulor ïa kiba bun ki ïing ha kaba ka la shim ruh ïa ka jingim jong ki san ngut.
Ar ngut napdeng kiba la mynsaw ki la kham shitom jur. “Ki bor sorkar ki la leit jurip bniah ïa ki jaka ba la jia ka jingshah thombor ha ki bor ka mariang bad ki la ïaleh katba lah ban pynbiang ïa ki jingdonkam jong ki lanot. Ka sorkar ka la leh katba lah na ka bynta ban ai jingïarap ha baroh ki liang na ka bynta kine ki lanot,” la pyntikna ka Myntri Rangbah.
“Ki bor sorkar ki la dei ban ïeng na ka bynta ki briew kiba donkam ïa ki jingïarap jong ki. Ngi la khmih bniah ha kaba ïadei bad ki jingjulor baroh. Ka jingduh kaba kham jur ka la long halor ka jingduh noh jong ki mynsiem briew,” la bynrap shuh shuh ka Mamata Banerjee.
Ka la pynpaw ruh ka jingsngewnguh ïa ki bor sorkar na ka bynta ka jingtrei shitom jong ki ha kaba ïadei bad kane ka jingjia kaba la ktah ïa kiba bun ki nongshong shnong.
“Ki doktor ki nurse bad ki nongtrei jong ki jaka ai jingsumar ki la trei bha na ka bynta ban ai jingsumar ïa kito kiba la mynsaw. Ka jingpyllait im ïa ki lanot ha kylleng ki jaka ka la kut,” ka la bynrap shuh shuh.
Ki la don kumba 170 ngut ki briew kiba la mynsaw kiba la shah pynkit ha Jalpaiguri Medical College and Hospital.
Ki 200 ngut kiwei pat ki la shah pynkit sha Maynaguri Hospital bad sa kumba 100 ngut kiwei pat ki la shah sumar ha Barnesh Health Centre. Kumjuh kane ka ‘erïong ka la ktah ruh ïa kiba bun ki jaka ba marjan kum ha Aliupurduar bad Cooch Behar distrik bad ha kine ki jaka ym shym la don ki ban ïap ne mynsaw.
U Myntri Rangbahduh u Narendra Modi u la pynpaw ka jingsngewlem halor ka jingïap jong ki briew na kane ka jingkhie ka ‘erïong kaba la ktah jur ïa ka Jalpaiguri distrik.
U Modi u la ong ba u la ïakren bad ki heh ba dei khmih bad bthah ïa ki ba kin pyntikna ha ka ban ai jingïarap sha ki lanot kiba la shah ktah jur.
Kiba bun na ki ïing trep ki la julor lut bad ki ïing ba la shna bha ruh ki la julor, ki dieng ki la shah jynrat naduh tyllong bad ki dieng pynïeng sainar ilektrik ruh ki la kyllon lut ha kiba bun ki jaka na ka jingkhlaiñ jong ka lyer ha kiba bun ki bynta jong ka distrik, la ïathuh ka tyllong khubor.
Ïa ki briew kiba la ïap ha ka jingjia la tip kyrteng kum u Dwijendra Narayan Sarkar (52), Anima Roy (49), Jogen Roy (70) bad u Samar Roy (64).
