Lucknow, ïaïong:
U Shahid Siddiqui, uba long u Vice President seng kmie jong ka Rashtriya Lok Dal (RLD), u la phah ïa ka shithi iehnoh kam na ka seng halor ka rai jong u Jayant Chaudhary ban ïasnohkti bad ka seng BJP ha shwa ban ïakhun ïa ka ilekshon Lok Sabha.
“Hynnin ka sngi nga la phah ïa ka shithi iehnoh kam jong nga sha u President jong ka seng u Jayant Singh,” la ong u Shahid Siddiqui ha ka jingthoh ba la phah lyngba ka rynsan phah khubor ka X.
“Mynta, haba ka Riti synshar bad ka synshar paidbah ka don hapdeng ka jingma, ban shu sngap jar ka long ka pop. Nga da sngewnguh ïa u Jayant hynrei da ka jingsngewkhia mynsiem ngam bamse ban jngai noh na ka seng RLD,” u la bynrap.
Ka seng RLD dang shen ka la pynïasoh bad ka kynhun synrop National Democratic Alliance (NDA) hapoh ka jingïalam jong ka seng Bharatiya Janata Party (BJP) bad pynbna ïa ki kyrtong na ka bynta ar tylli ki konstitwensi ha Uttar Pradesh ban ïakhun ïa ka ilekshon Lok Sabha.
Ha ka jingïakhun ïa ka ilekshon Parliament jong u snem 2014, ka seng RLD ka la ïakhun ha ryngkat ka jingïatreilang bad ka seng Congress bad ha u snem 2019, ka la ïakhun ha ryngkat ka jingïatreilang bad ka seng Samajwadi Party (SP) bad ka seng Bahujan Samaj Party (BSP).
