Ka jingpakhang ïa ka jingïaid ki kali na ka surokbah National Highway-6 kaba la sdang na Tongseng haduh Malidor, East Jaiñtia Hills ba la pynlong da ka Joint Action Committee (JAC) jong ka dong Namchiang hapoh ka Elaka Narpuh, ka dei hok ban ïoh jingkyrshan. Ka jingsniew jong kane ka surok ka long shaba palat liam watla ka dei ka surok kaba pynïasoh ïa ka Meghalaya bad kiwei pat ki bynta jong ka thaiñ Shatei Lam Mihngi. Tang shu la jur u slap, ka jingïaid ki kali na kane ka surok ka la shah ktah. Hynrei ha ka por tlang, ngim ju ïohi ba kan don ka jingmaramot kaba thikna. Naduh ka jingshlei um haduh ka jingtwa khyndew, ki nongïaid na kane ka surok, ki la mad lut ïa ki jingeh. Ka dei hok ïa ki nongshong shnong katei ka thaiñ ba kin bitar haduh ba kin da shet ja shet jyntah syndon hapdeng jong ka surok.
Ngi la ïohi ha ka Sngi Saitjaiñ, hadien ba la pynbna ïa ka jingpakhang ïa katei ka surok da ka JAC, ba u Myntri Rangbah, u Conrad K Sangma, u la lum jingïalang bad ki heh ka NHAI, NHIDCL bad sorkar jylla ban wad ïa ki lad ki lynti kumno ban maramot ïa katei ka surok bad kumjuh ruh ban pynduna ïa ka jingtuid jong ka um bad ka khyndew sha surok. Hynrei yn ym pat lah ban pyntreikam ïa kino-kino ki rai khamtam ha kaba ïadei bad ka jingmaramot ïa ka surok namar ka dang dei ka aïom slap. Ha ka jingshisha, ka NHAI/NHIDCL ki la dei ban shimkhia naduh ki por ba la leit noh ban maramot thikna ïa katei ka surok bad ym ban shu lape tang nalor. Ka jingïaid ki kali, naduh kiba heh haduh ki barit, na katei ka surok kam dei kaba kai ha ka shi sngi. Ka surok kan ym lah ban shan slem na ka jingtuid jong ka um bad lada ïaid sa ki kali heh. Ngin shem ba tang hadien katto katne por, ka surok kan sa julor haduh bym ikop shuh ba kan dei ka surokbah (National Highway).
Wat na ka bynta kito ki bym ju ïaid na katei ka surok, hynrei lada ki shu peit tang na ki dur ki dar, kin ym ikop shuh ba kan shah khot kata ka National Highway. Hynrei ki kali kin hap ban ïaid namar kim banse bym don shuh da kawei pat ka lad. Nalor ba ka pynthud ïa ka ïaid ka ïeng ki kali, ka jingjot rathai jong ka surok ka buh jingma ruh ïa kiba pyndonkam ïa ka. Na ka liang ki nongïalam ka JAC ki la kren shai ba lada wan kino-kino ki bor ba halor kiba kwah ban ïakren ban weng ïa ka jingïakhih, kin ym pdiang da lei-lei tad haduh ba kin maramot ïa ka surok naduh Tongseng haduh Malidor. Ka JAC ka la kren skhem ruh ba wat lada ka jingpakhang surok kan shim por da ki bnai ruh, kan ym weng ïa ka jingïakhih katba ka sorkar bad NHAI kim pyndep ïa ka kamram ka jong ki kata ban maramot ïa ka surokbah.
Ïa kiba kum kine ki jingïakhih, yn hap ban kyrshan lang da baroh, bad ym dei ban shu ieh tang ha ki nongïalam jong ka JAC namar ym dei tang ma ki kiba pyndonkam ïa katei ka surok. Ïa katei ka surok la shna da ka pisa paidbah, bad ym na ka pla tyngka shimet jongno-jongno. Baroh ki don hok ban ïoh ïa ka surok kaba bha bad kaba yn ym buh jingma ha ka ïaid ka ïeng. Ka pisa sorkar ka dei kaba la lum na ka khajna ba siew da ki paidbah. Ka NHAI ka lum khajna na ngi ki nongpyndonkam ïa ki surokbah lyngba ki Toll Gate jong ka kiba don ha kylleng. Namarkata, ka dei ka kamram jong ki ban peit ba ki paidbah kin ïoh ïa ki surok kiba biang nadong shadong. Lehse ka NHAI ka don ïa ki karikor kiba tbit kiba lah ban wad ïa ki lad ki lynti kumno ban pynduna ïa ka jingjulor jong ki surok da kaba khanglad ïa ka jingtuid palat jong ka um bad khyndew. Lada kita ki karikor kim lah ban wad ïa kita ki lynti, kam myntoi ba kin don ha ka kam, bad la dei ban wad noh da kiwei kiba kham tbit bad kiba don jingnang jingtip.
Lehse katei ka jingpakhang surok ka lah ban nang jlan, hynrei lada ka JAC ka leh shisha kumba ka la pynpaw paidbah, ka sorkar bad ka NHAI kin ym don lad da kumwei pat, hynrei ban pynthikna ba tang shu rang u slap, ka jingmaramot ïa katei ka surokbah kan sdang noh. Ka lah ban shimpor da ki bnai ban pyndep ïa ka jingmaramot. Kata kam lei-lei. Hynrei ka jingmaramot ka dei ban long kaba paka khnang ba ki paidbah kin ym ïakynduh jingeh shuh hadien habud. Kam don jingmut ban maramot tang malu-mala namar tang hadien katto katne por, kan sa julor biang bad ha kata ka por, ngin sa sakhi biang ïa ka jingïakhih ne jingpakhang surok. Ka shong ha ka sorkar bad ka NHAI ban ïa rai kaei kaba ki dei ban leh.
