Ka bynta jong ka surok kaba don na Laitlyngkot shaduh Pynursla kaba dang pyntrei mynta da ka National Highway & Infrastructure Development Corporation Limited (NHIDCL), ka la pynsyrtok shi katdei eh ïa ki nongleit nongwan khamtam ki paid jong ka Riwar Mihngi namar ka jingtwa kaba khari-khari jong u lum, maw bad khyndew. Ngi la sakhi ba ym tang ba ka la pynsyrtok hynrei ka jingtwa khyndew bad u lum, ka la wanrah ruh ïa ki jingjia kiba sngewsih na ka jingduh noh ïa ki mynsiem briew na ka jinghap jong ki kali sha ki riat, ka jingshah ban ha ki maw heh kiba la jia bunsien.
Ym lah ban tip ne sngewthuh ba na kaei ka daw ba ka jingshna ïa kane ka surok ka shimpor bad suki shaba palat. Ka projek Shillong-Dawki Road ka dei kaba la bei tyngka da ka Japanese International Cooperation Agency (JICA) ha ka jingmang pisa kaba kot shaduh ka T.1377.5 klur. Katkum ki jingïathuh jong u Symbud Myntri Rangbah ka Jylla u Bah Prestone Tynsong, ïa ka bynta jong ka surok na jingkieng Umshyrpi haduh Hynñiew Mer la buh ban pyndep ha u bnai Nohprah, jong u snem 2025 hynrei kane ka la lyngkrang ha kaba wat haduh mynta ym pat lah satia ban pyndep pura bad ïa ka bynta ba sah jong ka surok shaduh Dawki la buh thong ban pyndep ha u Nohprah, 2026 hynrei kane ruh imat kan nym poi shaei shaei ruh bad kine ki jingkam ki lah ban dei tang ban pynbiej ïa ki paidbah, namar ha kaba kut uba syrtok dei u paidbah ym ki heh ki haiñ.
Ngi la sakhi ba halor kane ka jingtrei kaba la suki bad pynsyrtok ïa ki nongleit nongwan, ki la mih kiba bun ki kynhun ban pynsngew ïa ka jingsngewkhia bad ruh ban dawa na ka NHIDCL ba kan pynsted ïa ka kam. Hooid watla ka surok na jingkieng Umshyrpi kaba dei kaba kongsan bha kaba pynïasoh bad ki district kiba bun ka la kham pynsting ïa ka jingdheng kali hynrei ka jingbym lah ban pynbit pynbiang pat ïa ka bynta jong ka surok na Laitlyngkot sha Pynursla khamtam ha ki bynta jong ki jaka ba dang bteng ka jingtih bad pynhap khyndew, ka la pynsohsat shi katdei eh ïa ki paidbah kiba ju pyndonkam ïa kane ka surok.
La sakhi ba ka jingbym lah shuh ban ïaid lyngba kane ka surok namar ka jingtwa khari khari jong u lum bad ki mawheh, ka la pynlong ïa ki kali kamai ban hap ïaid na Sohra ne na Jowai, haduh ba ka la ktah shibun ym tang ïa ki kali kamai khamtam lei ïa ki paidbah ha kaba ki la hap ban siew da ka dor kaba heh. Hato ka Sorkar, ka sngewthuh ïa kane ka jingeh ba ïakynduh da ki briew khamtam lei kito kiba wan na ki longïing kiba kham duna ka jingïoh. Lada dei ba ka Sorkar ka sngewthuh, ka la dei ban bthah bad hukum ïa ka NHIDCL ba ka dei ban pynsted ïa ka kam namar kane kam ktah tang ïa ki nongshong shnong ka thaiñ Riwar, hynrei ka ktah ruh ïa ka ïoh ka kot jong ki, kaba wan lyngba ki kam jngohkai naba ym don ba nud shuh ki ban hiar leit kai sha katei ka thaiñ, ki nongrep ruh ki la shah ktah jur bha.
La ju sakhi ba tang haba don ka jingtwa khyndew ne jingïap briew ba ka Sorkar ka hiar pynsted ban leit jurip ne peit ïa ka jinglong jingman bad ruh haba don kiba ïakhih bad pyrta lait nangta i kumba kam don jingpatiaw satia ban peit kumno ka jingtrei ka ïaid ne ban bthah ïa ki nongpyntrei ba ki dei ban pynïaid sted ïa ka kam bad lada kim lah dei ban leh da kaba tyngeh. Barabor la ju sakhi ba kino-kino ki projek kiba wan bad pyntrei, ki la don beit da ka por ban pyndep hynrei kiba bun ne jan baroh, ym ju lah satia ban pyndep ha ka por bad dei tad hadien bun-bun snem ba sa lah ban pyndep. Ym lah ban tip kaei ka daw halor kane, balei ym lah ban pyndep biang por ïa ki projek. Kine ki rukom ki dei kiba ju wanrah bad pynïakynduh jingeh ïa ki paidbah.
Imat ka NHIDCL ka klet ba kane ka surok ka ïalam sha Dawki-Tamabil kaba dei ka lynti ïaid ki kali ban khaïi pateng sha Bangladesh. Kam dei ka surok kaba malu-mala. Da ki phew hajar ngut ki hap ban shaniah ha kane ka surok na ka bynta ka jakpoh ka jong ki. Lada ka surok kam biang, ka kamai kajih jong ki paidbah ruh ka shah ktah jur. Nalorkata, ka ktah ruh ïa ki briew kiba donkam ïa ka jingshah sumar sha Shillong bad kiwei ki jaka. Ban shong kali ha ka surok sniew, ka ktah shikatdei ïa ki briew ki bym don hapdeng ka met kaba koit. Ha kajuh ka por, ka ktah ruh ïa ka jingleit jingwan ki nongjngohkai pyrthei. Tang ka jingduh suda kat shaba phai. Lada ka long ha kane ka dur, ka Sorkar ka la dei ban ym ai ïano-ïano ban shna ïa ka surok bad ban pynneh beit ïa ka surok barim kaba kham skhem bad kham shngaiñ.
