Raphael Warjri
Ha ka pyrkhat Khasi ka snap longblei ka kynthup ïa baroh ki jynthaw ba pynlong ka bha ka miat ïa ka longbriew manbriew ha baroh ki liang kaba kynthup ruh ïa kiwei ki jynthaw ba im kiba khih ba par kum ki mrad ki mreng, ki sim ki doh, ki dohkha dohpnat, ki khñiang ki ksiah bad kumjuh ruh ïa ki jingim baneh kum ki jynthung jyntep, ki maw ki dieng bad kumta ter ter. Ha ka imlang sahlang la ju nam ha ka kyrteng Blei bad kata ka long kaba biang lada ñiew ba ym dei kynthei ne shynrang, marwei ne shibyllien. Hynrei kaba lymbiang ka long ba la pynman ha ka dur ka dar briew ïa U Blei ban jer kum u shynrang briew, katba ha ka saiñpyrkhat Khasi, Blei, ym dei briew ne mrad ym dei jynthung ne maw, hynrei dei kyllum lang kawei shityllup kiba bsa jingim markylliang ïa ki para jynthaw ha pyrthei. Kita baroh lang dei marwei shitylli ka snap longblei. Ka dei kata ka daw ba la ñiew tang wei Blei, lehse hadien ba wan ka niam Khristan ba la kylla noh ban shah lam bad kam u wei U Blei, ba haba kynnoh ‘U’ te dei u shynrang, U Blei shynrang. Hynrei ha ka jingshisha ka pyrkhat Khasi ka dei ka ba ym don ban pynman briew ïa ka snap longblei da kaba ñiew kynthei ne shynrang lane ban ñiew marwei ne shi byllien. Lah ban pynkynmaw biang sa shisien ba ki paidbynriew Khasi mynnor ki nam Blei, U Blei, Ka Blei, Ki Blei bad kata kam mut tang ha ka dur ka dar jong ki briew, hynrei ka lah ban long da kino kino ki jynthaw kiba pynbha pynmiat ïa ka sawdong sawkun jong ka pyrthei shityllup.
Kumba la kdew hashwa ba ki don kita ki bor ka mariang kiba lah ban pynsniew ïa ki paidbynriew, hynrei ki pynbha pat ïa ka sawdong sawkun jong ka mariang shityllup ban pynbha biang ïa ka longdien jong ki jynthaw baroh ha ka lawei, kynthup ïa ki briew. Kum kita ki bor maïa ruh lah ban ñiew ba dei ka bor longblei (divine force). Kita ki bor longblei ki don byllai hynrei kiba na thymmei dei u pyrthat bad jumai kum ba la kdew hashwa. Barabor ka ju jia kum kita ki bor ban lynsher ïa ka pyrthei ka dei namar ba ka mariang ka shah mushlia palat pud ha ki para jynthaw bad barabor hi dei ki bynriew kiba marmlien ïa kata. Kumta ka dei ka nong ïa ki paidbynriew haba shah pom ha u pyrthat ne khynñiuh u jumai. Kumjuh ruh haba klang bad pluh ka ding, haba lynshop ka eriong erngit, kyllang ne langthari, haba lynsher ka umbah ka umsaw bad kumta ter ter, ki dei ka nong na kaba lushia, ba khynra bad mushlia palat liam ki khun bynriew ïa ka meiramew ka meimariang. Ym tang ïa ka meiramew bad meimariang ba ka nong ka urlong ha ka jingim briew, hynrei ka dei ruh ha kaba ïadei bad kiwei kiwei ki jynthaw bad katno tam lei lei ïa la ki para bynriew. Kumta ka ba leh bha markylliang ïa kiwei ki briew ka wanlam tang ka jingbha suda kum ka nong na ka bynta ki kam babha. Ha kawei pat ka liang ka ba leh sniew ïa kiwei ka wan lang ka nong katkum kata ka kam sniew ne ka lah ruh ban kham sniew shuh shuh, hynrei ki briew ki ikmen tohhoh ïa kaei kaba ki ioh myntoi shikhyllipmat na kaba lehsniew ïa kiwei.
Kaba ioh nong na kaba lehbha ïa kiwei ka wanlam arshah laishah ka jingbha ha ka jingim briew, namar ba kito ki ba mad ïa ki kam babha ki ïa pur khana sha kiwei pat ban dang ïai rasong ka nam babha haduh ba kin don ruh ki ban ïai pyrto shilynter. Hynrei kaba iohnong na kaba leh sniew ïa kiwei kum ka kam thok ikam shukor ka lah ban pynkmen shipor ïa ka jingioh nong na kaba kiba shah thok shah shukor kin sa lap ïa ka jingshisha. Wat lada don kiba buit sianti katno katno ruh haba ki leh thok, kan don beit ka jingsngew artatien ïa kito kiba ngop la ka kupar ha kata kaba shah thok shah shukor bad shah shet kylla.Kumba ym lah ban buhriew ïa ki kam babha kumta ruh ym lah ban buhrieh ïa ki kam sniew, wat lada pyrshang katno katno ban leh sian. Hynrei ha ba pyrkhat ïa ka nong ha ka lawei pat, kaba leh bha ka dang kynton shuh shuh ki jingbha kiba arshah laishah. Ha kajuh ka rukom ki kam sniew ruh ki don da ka nong kaba khate pynbah ïa ka jingïadei ka jingim briew ha ka imlang shalang. Lano lano ruh ym don shuh ki ban shaniah ïa kiba marmlien ban thok ban shukor bad kum kita ki briew kiba leh sniew ïa kiwei ha kaba khatduh kin sah ha ka lanot ka shipa tang marwei. Katno ba ha ka liang kito kiba leh bha pat ka kynton bad ïai kynton ka nam babha ba baroh baroh kin synrop lang ban ïaineh ka jingïarap markylliang ban nang ïa kiew irat baroh lang. Kumta ka shong ha ki riewshimet marwei ban jied ïa kaba bha ne kaba sniew ha ba latip lypa ba ka nong ba ïaineh bad kynton ban dang pahuh shuh shuh.
Ka jingshisha ha ka imlang shalang pat ka don ka jingpynshoi kaba khlaiñ bor haduh katta katta ban leh buittuh da ki kam thok kam shukor na ka bynta ban ioh myntoi shikhyllipmat bad kim lah shah ban kamai da ka nam babha kaba ïaineh shiryta ban myntoi barabor ha manla ka jingim briew na kawei ka por sha kawei pat.
