D H Kharkongor
Ha ka jingshisha nga kwah ban bteng biang ïa kato ka phang kaba myn ha ka taïew kaba dang shu dep tangba wei haba uba bun u dei u riewieit ‘Football’ ba wat nga ruh ngam lah khlem da ïa kren khyndiat shaphang kane ka ‘FIFA World Cup 2026’. Ka dei na I ‘pa’ I jong nga, ba kum u khynnah, nga sdang ban sngewtynnad ïa ka ‘Football’. Kaba katno tam wei ba I pa jong nga I dei I ba ieit bad I ba sngewthuh bha ïa ka ‘Football’. Ka dei na I ba nga ioh sngew nyngkong eh shaphang ka nam ka jong u Pele jong ka Brazil lem bad kata ka ‘Cosmos Football Club ka jong u, kata, ha man kaba I poi ban ïalap ïariewshaphang u Pele bad ki riewieit ‘Football’, kiba ïa ryngkat kyrta. Katba na I pa-deng I jong nga pat de nga iohsngew ïa ki khana shaphang kata ka ‘Mohamedan’ bad ka ‘Mohan Bagan’, kiba nga sngewthuh ba ki dei ki 2(ar) ki football club kiba radbah jong ka West Bengal lane Calcutta.
Kumba nga ong, kata baroh ka dei mynba nga dang dei tang u khynnah lane mynba ngim pat tip ban ïa phohsniew ïa ka Television (TV). Ka dei ruh na ki baroh arngut ba ynda nga la khreh kynjoh sha ka jinglong samlalud ba nga saithuh bad sngewthuh ïa ka jingtbit ka jong u Diego A Maradona jong ka Argentina. Nga kynmaw ba ki baroh arngut ki ïa kyrshan lane ki ïanoh mynsiem langsha ka Argentina, tang namar ka jingtbit lane ka sap ïalehkai ka jong u Maradona. Nga kynmaw ba nga ïakmenlang bad ki mynba ka Argentina ka jop kumto ïa ka England lyngba kito ki ar ki ‘goal ki jong u Maradona. Ngam kynmaw ruh de ba nga ruh nga diaw mynsiemlem bad ki ynda haba ki diaw mynsiem ynda haba ka Cameroon ka pynliem noh kumto ïa ka Argentina. Kata ka dei ka Argentian ka jong u Maradona, u Cannigia bad u Batistuta. Kata ka dei ynda haba ngi baroh ngi la ioh lad ban don ïa ka TV.
Nga la iohsngew da la ki jong ki shkor ïa ka nam ka jong u Pele, nga la sakhipat de ruh da la ki jong ki khmat ïa ka sap ka jong u Maradona.Hynrei ynda kumne mynta ha nga hi shimet uba kynsai tam eh na baroh u dei une u Lionel A Messi jong ka Argentina. Te ha kaba ïadei kyrpang beit thik tang bad ka ‘Football’ ba ha nga shimet u Messi u dei uba kynsai tam na baroh wei ba u don ha u ïa ka sap ïalehkai kaba kyrpang (innate skill) kaba lem bad ka jingshemphang kaba kynsai (intelligence).Ha nga kitei baroh ar ki dei ki jingaisngewbha (gift) kiba kyrpang ki jong u Blei ïa u Messi. Nga kubur ba ym pat ju don uba kat u ‘Messi’ kumba nga kubur ba aratien ba yn dang mihpyrthei biang uba kat u ‘Messi’.
Kumta ha kaba ïadei kyrpang beit thik tang bad ka ‘Football’ ba nga kubur ba u Messi u dei shisha u ‘Genius’ bad ruh u ‘Magician’. ñiuma ki don ki nongïalehkai ‘Football’ kiba kham jrong ka ryngnieng rynñiot, kiba kham wan dur ka met ka phad, kiba kham don dur don dar bad kiba kham khraw ka spah ban ia u Messi hynrei ha kaba ïadei kyrpang beit thik tang bad ka ‘Football’ ba ym don uwei ruh u ban ïa ryngkat kyrdan bad u Messi, la ha kano kano ka bynta. Kaba katno tam ha ka liang jong ka jinglong kaba sngewrit lane ka jinglehrit, kaba ïaidryngkat ryngkat bad ka jingjemnud lane ka jinglong kynjai.
Ha kaba ïadei bad ka ‘FINAL’ jong ka ‘FIFA World Cup 2026’, kaba hapdeng ka Argentina pyrshah ïa ka Spain ngam lah ban ong mano napdeng jong ki ka ban ioh rah ïa ka nam lahduh. Nga ong ka Argentina pyrshah ïa ka Spain bad ym u Messi pyrshah ïa ka Spain lane u Messi pyrshah ïa u Yamal.Nga shim ba ka long kuntawei ba ha nga hi shimet wat lada ka Spain kan rem pynban kan dei ka jingjop donburom jong ka Argentina bad ym ka jingjop ka jong u Messi. Lada kan jop ka Spain kan dei ka jingrem jong ka Argentina bad ym ka jingrem jong u Messi. ïa nga hi shimet kam da pher than eh lada rem ka Argentina lane lada rem ka Spain. Kam pherwei ba ïa nga hi shimet ka dei ka jingangnud ka jong nga lane ka jingthrang ka jong nga ba ngan ioh lad ban dang ïaisakhi ïa ka sap kaba kyrpang ka jong u Messi. Ka sap kyrpang kaba la ai sngewbha da U Blei. Ka sap kyrpang kaba ju pynshohbiej ïa nga. Ka sap kyrpang kaba ïaipaw shynna kawei hadien kawei, kaba paw pat de ruh ha ki rukom kiba pher ba pher bad ha ki khyllipmat kiba ngam ju poi pyrkhat. Ngam kwah ban duh peit ïa ka ‘Final’ jong ka ‘FIFA World Cup 2026’. Ngam kwah naba lehse kandei ka kabu kaba khatduh ia nga ba ngin ioh ban sakhi ïa ki ‘Magical Moments’ kiba khatduh ki jong u Messi, uba nga kubur ba u dei u ‘Footballing Magician’ lane u ‘Footballing Genius’.
