New Delhi, Naitung:
Katkum ki khubor, la ong ba u Akhil Joyan, uba dei u nong Kerala, u long uwei napdeng ki saw ngut ki nong India, kiba la iap ha ka jingshah hiar thma jong ka Russia ïa ka jhad kit mar, ka MV Golden Leo, harud ki um duriaw jong ka nongbah Odesa jong ka Ukraine. Une u samla uba dang 26 snem ka rta uba shong ba sah ha Vellarikkundu hapoh Elaka Kasaragod, la ong ba u dang pynkhreh shitom ba un ioh ban shongkurim noh hapoh jong kine ki ar bnai ki ban wan.
U Joyan u la trei kum u nongpyniaid jong katei ka jhad la hynriew snem mynta bad u dang wad lad ban ieh noh shen ïa katei ka kam. Katkum ka jingïathuh jong ki briew kiba ïajan bad kiba ha ïing jong u, utei u samla nongkit lieng, u dei u khun marwei jong ka Joyan, kaba trei ha kawei ka dukan die bording bad ka Sally, kaba dei ka Insurance Agent.
Haba pynkynmaw ïa ka jingiakynduh kaba khatduh jong u bad ka Joyan, u Joseph u la ong ba utei u samla u la wan phai sha iing kumba dang ha kine ki lai bnai ba la dep naka bynta ka jinglehniam iateh ban pyniateh ktien ïa ki.
U Joseph u la ong ba u Joyan u dei uba la pawnam bha ha katei ka thaiñ bad u dei u nongialehkai tug-of-war uba pawnam bha. La iathuh ba u dang wad lad ban ieh noh ïa katei ka kam bad ban trei noh da kawei pat ka kam hashwa ba mun shongkurim noh bad katei ka samla jong u.
Ki bahaïing jong u Joyan ki la ïoh jingtip halor ka jingïap jong u ruh dei lyngba ka email ba ki la ïoh na katei ka kompeni pyniaid jhad kaba u trei, ha ka janmiet jong ka Sngi Nyngkong.
Ha kajuh ka por, ka ophis jong u Myntri Rangbah ka Keraka, ha ka kyrwoh, ka la ong ba ka la bthah ïa ka tnat Non-Resident Keralites Affairs (NORKA) ba kan ïatreilang bad ka tnat Consulate jong ka Russia bad ka tnat kam bar ri ban wad jingtip shuh shuh hadien ka jingïap jong une u nong Kerala ha katei ka jingjia.
