Bertina Lyngdoh
Ka jingtrei shitom ka dei ka lad ka lynti ban im. Ka jingdon ki paralok ba sngewthuh, ba isynei, bad ba tip lem para mynsiem briew, ka long ka lad kaba bes bha ia u briew ban im. La ju ong ba lada kawei ka jingkhang ka khang, kawei pat ka plie ban nym pynduh jingkyrmen ïa u briew. Haba im bha, im tip briew tip blei, ka lad ka lynti ruh ka plie da kaba bha. Haba plie ka lad ba bha, ym long keiñ ban pynsepei ïaka. Haba lad pat kam plie, u im ha ki jingduh jingkyrmen. Don ki khep, ba bun ki lad ki plie na ka bynta jong u, katba don ruh pat ki khep, ha kaba ki lad kim plie satia. Yn leh shuh kumno keiñ jarjar ka nusib, jarjar ka jingim briew.
Ka jingim briew hi bunsien, khlem la ki jingshem jingïakynduh. Kaba bha ruh u ïakynduh, ki jingeh ruh u ïatakhuh. La un biang haka spah ka phew ruh, hynrei un don beit pat kawei na ki lad ka bym plie ïa u. U briew um ju lah ban im sah ha ka jingkhang lynti hynrei un ïaleh katba lah ban wad ïaka lynti kaba plie na ka bynta jong u. Kum ka nuksa, lada hap ban poi sha ka jaka kaba u thmu ban leit, un hap ban wad ne ban tip da kano ka lad ban leit. Haba u don ha ki jingeh, un hap ban wad ïaka lad ka ban weng noh ïa kata ka jingeh. Haba u sngewsih ruh, u wad ïaka lad kaba lah ban pynkmen ïa u. Haba thngan u wad iaka lad kamai ban pynim ïa u. Te dei kum kine, ba ka lad ka don ïa man u briew. Sngew bynñiaw pat ba bym biang lut ha baroh ki liang, ba sngewbiej sngewpoh ïala ka longrynïeng, bym kwah ban thad ïano ïano ruh, ka pynlong noh ban ong ba lad kam plie. Dei namar kane, la u jynjar sa ba jynjar ruh, la un babe ruh ym don jingmyntoi, u kun hi khiah khlem pynsngew ïano ïano ruh. Ka jinglehraiñ ka dei kawei na ki jinglong kaba khang ïaka lad ka ban nym pynpaw ne pynsngew ïa ka jingshem ne jingïaid lynti jong u.
Namarkata, haba lad kam plie, um shlan ban pynsngew namar u tip ba bym lah leh eiei. Namarkane, u sngew ba dang lah ban sngap ban ïa kaba u ud u nam. Da kumne, bunsien u im ruh ha ki jingduh jingkyrmen la kum ban ong noh im tang ban im lane bym banse. Kynmaw ba kane kam pynsngewbha ïa ka jingim jong u, ka ktah khamtam ïa ka koit ka khiah jong u khamtam eh ha ka borpyrkhat. Kumta, to pyrshang ba ngin nym long kumta, hynrei ba ngin long kita kiba don bad lah ban pyndonkam ïa ki lad ki lynti ba bha.
