Imphal Nailar:
Ki bor pahara ha Manipur ki la ïoh ban kem ïa 6 ngut ki dkhot jong ka kynhun pyntriem ba la shah ñiew beaiñ ka Kanglei Yawol Kanna Lup (KYKL) ha ka jingleit khynra kaba la long ha Awang Potsangbam, kaba don ha Imphal West District ha ka 26 tarik, Nailar.
Ïa kine ki lehnoh kiba la shahkem la tip kyrteng kum u Oinam Naocha Meitei, 26 snem, u Tharoijam Nanao Meitei, 25 snem, u Yumnam Amit Kumar 38 snem, u Sandam Roshan Meitei 24 snem, u Moirengthem Boy Singh 41 snem bad u Waribam Ibomcha Meitei 35 snem.
Ki shipai ki la kurup ïa ki tiar kiba bun, kiba kynthup hynrei kim shym la kut tang ïa ki lai tylli ki suloi ba don Lens ne ki Scope; lai tylli ki kuli kiba ym pat pyndonkam, ka Tube Launching kaba thylli, ka kali saw tylli; hynriew tylli ki Mobile; ki tiar pyndonkam jong ki shipai bad kiba bun kiwei pat ki tiar pyndonkam ha ka por ba la pynlong ïa ka jingleit khynra.
Ha ka jingbuddien lyngba ka jingpyntreikam, ki pulit ki la leit khynra shuh shuh sa ïa kiwei pat ki jaka bad ki la ïoh ban kurup ïa ki tiar siat bad pynbthei, kynthup ïa kawei ka suloi shi ktang, kawei ka suloi DBBL, ar tylli ki kuli bym pat pyndonkam, lai tylli ki kuli AK-47 ha ryngkat 75 song ki kuli, san tylli ki kuli jong ka suloi M-16 ba la thylli, 230 tylli ki song kuli, hynñiew tylli ki wireless walkie-talkie ha ryngkat ki Charger, ki tiar pyndonkam jong ki shipai, ka Laptop bad ka Hard Disk.
Ha kawei ka jingjia kaba ïadei bad kane kajuh ka sngi, ki pulit ka Manipur ki la kem ïa uwei u dkhot jong ka kynhun ba la shah ñiew beaiñ ka UNLF (Koireng) na Heingang Makha Leikai kaba don ha Imphal East.
Ïa une u briew uba la shah kem u la tip kyrteng kum u Konsam Romesh Meitei 43 snem, ha kaba la ong ba une u la donkti ha ki kam dawa pisa. Ki pulit ki la ïoh kurup ïa ar tylli ki Mobile Phone, kawei ka bek pisa bad kawei ka kali ar shaka na ka jingkhynra pyrshah ïa u.
