Ka jingjah rngai jong ka jaitbynriew ka lah ban ym dei namar kita ki bar jylla lane ki mynder, hynrei na ka daw jong u drok. Ka Meghalaya ka la sakhi ïa ka jingkiew jong ki nongdih drok hapoh ka jylla shaduh ka 3 lak ngut, bad kane ka la paw na ka jubab ba ai da ka sorkar jylla ha Ïingdorbar Thawaiñ ha kane ka Dorbar Synrai kaba dang ïaid mynta. Hynrei kaba sngewsih pat ka long ba haduh mynta, dang don tang 10 tylli ki ‘Rehabilitation Centre’ lane ki shlem ban ai jingïarap ha ka liang ka dawai dashin bad kiwei ïa ki nongdih drok. Ka long shisha kaba shyrkhei ba haduh katne ngut kiba la ngop ha u drok, bad lehse ki lah ban nang don shuh kiba khlem pat paw kyrteng. La antad ba ka jingdon paid ha ka jylla jong ngi ka long 30 lak tam, bad na kine, haduh 3 lak ki la ngat ha ka jingkyrni jong u drok.
Na ka liang u Myntri ka tnat Social Welfare, u Bah Paul Lyngdoh, haba jubab ïa ki jingkylli ba la wanrah da ki MLA ka Voice of the People Party (VPP) bad kiwei halor u drok, u la ong ba naduh ba la wanrah ïa ka projek ‘Drug Reduction Elimination and Action Mission’ (DREAM), ka sorkar jylla ka la dep mang pisa haduh T. 50 klur ban ïakhun pyrshah ïa u drok bad pyntip ruh ba hapoh kane ka projek, ka sorkar jylla ka la ïaid shakhmat ban thaw kham bun tylli ki ‘De-addiction Centre’ ha kylleng ki bynta jong ka jylla. U Myntri u la pyntip ba ki don haduh 10 tylli ki ‘Rehabilitation Centre’ hapoh ka jylla. Napdeng kine, hynriew tylli ki dei kiba la kyrshan da ka sorkar jylla lyngba ka tnat Social Welfare kata lyngba ka ‘Public-Private Partnership’ bad ki seng treimon sngewbha kiba tbit bad shemphang. U la ong ba kawei kawei ka jaka sumar ka lah ban pdiang tang 15 haduh 20 ngut, lada shim 20 ngut ruh kan ngiam 200 ngut ha kine ki jaka sumar, bad u la pyntip ruh ba ka sorkar ka la shimkhia ïa kane bad mynta ka dang pynkhreh ban buh ha baroh 12 tylli ki distrik ïa ki jaka ai jingsumar.
Ngi khlem poi pyrkhat ba ha kawei ka sngi ngin sa ngat ha kane ka apot sepsngi ha kaba ki khynnah bad ki samla, kynthei bad shynrang, kin ngop ha u drok kaba pynkordit ïa ka jingim jong ki bad ki longïing longsem. Tang kiba mad ki sngewthuh. Ka jingwan tuid jong u drok na kylleng sawdong sha kane ka jylla ka la pynngop ïa kiba bun bah katba kito ki nongwanrah bad ki nongshna drok ki riewspah bad ki im pahuh pahai. Nang syrtok mano, nang kamai mano! Ka long shisha kaba sngewtriem namar ïa u drok, ym shym la pynmih ne shna ha kane ka jylla. U shu wan hiar hangne na kylleng sawdong ka pyrthei bad jylla bad ki khun ki kti jong ngi, ki shu jot ei kha-ma-kha haduh ba ki hap ban pep na ki jingpule jong ki. Shisien ba la iehnoh ïa ka jingpule, ngi sngewthuh ba kan eh shibun ban pynkhreh ïalade na ka bynta ka lawei. Ka lawei ka shong ha ki khynnah bad ki samla, hynrei lada kiba bun na ki, ki la ngop bad jot ha u drok, shaei shuh kata ka lawei baphyrnai?
Kane ka jingdon jong haduh 3 lak ngut ki nongdih drok ka dei ban pynkyndit thiah ïa baroh namar ka jingïakhun kan hap ban sdang shwa na la rympei bad bud sa ha ka shnong ka thaw bad ka jylla baroh kawei. Lada ngim kylla thiah kylla dem mynta, ngim tip sa kaei pat ka ban pynlong ïa ngi ban ïa kyndit na ka jingïoh thiah lyngngai. Ngi dei ban sngewthuh ba tang ki pulit marwei kin ym lah ban leh eiei ha ka jingïakhun pyrshah ïa u drok. Baroh ki dei ban ai ïa ka kti kamon ka kti kadiang khnang ba ka jingïakhun kan khlaiñ bad seisoh. Ngim lah ban tei ïa ka lawei lada ki khun ki kti jong ngi, ki im hapdeng ka jingdum namar ka jinglong mraw ha u drok.
Kane ka dei ka por kaba khot lang ïa baroh sha kawei ka thong bad kata ka long ban rat dyngkhong ïa u drok na ki ïing ki sem bad ki shnong ki thaw. Ki khynnah bad ki samla ki dei ban long kiba husiar bha namar ki don bun bah kiba ap thap ïa ki na kylleng sawdong. Lada ki tlot ma ki, khlem pep kan long kaba suk ïa ki nongshun ban paring ïa ki sha ka jingjot da kaba pynngop ïa ki ha ka jingpyndonkam ïa u drok. Une u jait jingdih u long uba khlaiñ bor haduh katta-katta ba shisien ba la shah teh kynjri ha u, ka eh ban lait na ka jinglong kyrni. Ka met ka phad kan ym ailad ïa kiba la dih drok ba kin shongsuk shongsaiñ. Ïeng tylli ban rat dyngkhong ïa ka jingkyrni.
