Ki khynnah pule ka Nongjri Presbyterian Secondary School ki la wanrah nam bad burom ym tang ïalade bad ka skul, hynrei ïa ka jylla baroh kawei hadien ba ki la lah ban khur ïa ka nam lahduh ha ka sien ka banyngkong eh ha ka Under-15 jong ka lympung ïalehkai 63rd Subroto Cup International Football Tournament 2024 da kaba pynliem ïa ka Major Dhyan Chand Sports College kaba na Uttar Pradesh da 3-0 kol ha ka jingïakhun phainal kaba la long ha ka Sngi Balang ha ASC Centre Bangalore. Ka long shisha ka khubor kaba sngewtynnad bad ai mynsiem khamtam ba ka dei ka skul kaba na nongkyndong hangthie ha Ri-Bhoi. Kaba kham pynsngewtynnad shuh-shuh ka long ba ïa ka nam Best Goalkeeper la khur da u ‘rangapkol ka Nongjri u Thrisilbirth A. Sangma, katba ïa ka Best Coach la ïoh pdiang da u Pynkhrehlang Nongkseh uba dei u Coach jong kane ka kynhun. Ngi kyrmen ba ki khynnah na kane ka skul kin sa kylla long ki nongïalehkai kiba pawnam na ka bynta ka jylla bad ka Ri ha ki sngi bad ki por ki ban wan.
Lah ban pynkynmaw ba ha ka jingïaid lynti jong katei ka skul ha kane ka lympung ïalehkai, ka Nongjri Presbyterian ka la lah ban pynliem ïa ka Bangladesh Krira Shikkha Protishtan (BKSP) da 2-1 kol ha ka ‘Semi-Final’ katba ha ka ‘Quarter-Final’ ka la lah ban pynliem ïa ka Army Boys Company 2-0 kol. Ha ki jingïalehkai ba hashwa, ka Nongjri ka la lah ban pynliem ïa ka Sri Lanka da 6-0 kol, hadien ka la jop da ka ‘walk over’ ïa ka kynhun ïalehkai kaba na Madhya Pradesh. Nalorkata, ka la jop da 7-0 kol ïa ka International School Sports Organisation (ISSO) bad hadien da 8-0 kol ïa ka Dadra and Nagar Haveli and Daman and Diu (DD&DNH). Da shisha, ki khynnah kiba la shah jied ban mihkhmat ïa ka skul ki long shisha kiba tbit lada ngi peit na kane ka rukom jop naduh ba sdang haduh kaba kut. Ka jingïaroh ka leit ruh sha u nongpynïaid bad uba la hikai ïa ki khynnah ïalehkai, ki nongpynïaid, nonghikai bad ki kmie ki kpa jong kitei ki khynnah baroh.
Sa shisien pat, kane ka jingjop ka pyni ba ki khynnah bad ki samla jong ngi, kim dei shuh kiba dang duna ha ka jingïalehkai phutbol lada ki ïoh ïa ki nonghikai bad ka rukom shah hikai kaba biang nalor kiwei pat ki jingdonkam kiba manla ka sngi. Lehse ynda ki la wanphai, ka sorkar jylla bad kiwei kin sa leh burom kyrpang ïa kitei ki khynnah. Hynrei tang kata kam pat biang bad kam dei ban kut tang hangta. Kaei kaba ki donkam ka long ban shah hikai pyntbit shuh-shuh khnang ba kum ki nongïalehkai kin don ka jingnang jingtip bad jingshemphang kumno ban pynjanai ïalade ha kane ka jingïalehkai.
Lada lah ban ai ïa ki ka jinghikai kaba biang, khlem pep kin sa tyngshaiñ ha kawei ka sngi bad ngin sa ïohi ïa kitei kijuh ki khynnah ba ki ïalehkai na ki klob kiba heh jong ka Ri. Hynrei lada ym don eiei ban kyrshan ïa ki, kitei ki khynnah ruh lehse kin duh jingkyrmen bad ki lah ban leit wad noh da kiwei ki kam ki jam ban kamai jakpoh. Namarkata, ka sorkar bad kiwei pat ki kynhun, da kaba ïatreilang bad ki nongpynïaid jong katei ka skul, ka dei ban shimkhia ban peit ba kitei ki khynnah kin ïoh ïa ka jinghikai pyntbit kaba kham bha.
Ngim dei ban kheiñ dewthala ïa ki khynnah kiba don jingtbit ha ki kam ïalehkai namar jan baroh ki jingïalehkai ha kane ka juk ki dei kiba wanrah ja wanrah doh ïa ki nongïalehkai bad ki ïing ki sem jong ki. Ngi ju ïohi ba ki sorkar bad kiwei ki ju ai da ka pisa kaba heh sha ki nongjop ha ka lympung Olympics bad kiwei. Ngim lah ban len ba ha kine ki khyndiat snem, ka sorkar ka la pynleit jingmut ban thaw ïa ki madan ïalehkai phutbol ba la siang da u phlang plastik khnang ban ailad ïa ki nongïalehkai ban ïashim bynta ha ki jingïakhun. Nalor jong ki madan ïalehkai phutbol, donkam ruh ban pynleit jingmut sa sha kiwei pat ki jingïalehkai kiba ki khynnah bad ki samla jong ngi ki don ïa ka sap ka phong ba kin paw. Nalorkata, hap ruh ban ïoh da ki nonghikai kiba tbit khnang ba ki khynnah bad samla kin ïoh jingmyntoi kham bun ban ïa kaba ki ïoh mynta. Ngi dang donkam bun kiei-kiei ban pynlong ïa ka Meghalaya kum ka jylla kaba khlaiñ ha ki kam ïalehkai.
