Ka jylla Meghalaya ka dei kawei na ki jylla kaba la paw bha ha kiba bun ki liang, wat kumjuh ruh ha ki kam ïalehkai khamtam lei ha ka kam ïalehkai phutbol kaba dei kawei na ki jingïalehkai kaba naduh uba rit haduh kiba la heh la san ki ju sngew tynnad ban ïalehkai kat haba biang ka jaka tang ban ïoh kynjat bol.
Lah ban pynkynmaw ba ka Meghalaya naduh ki snem ba la leit, ka dei kaba la ju bna nam ha ka jinglah ban pynmih ïa ki ‘rangïalehkai phutbol kiba tbit. Wat ha ka thaiñ shatei lam-mihngi ruh ka la long ka jylla kata hadien jong ka Manipur ban sei ïa ki ‘rangïalehkai kiba tbit ban ïoh mihkhmat na ki club bad kumjuh ïa ka Ri ha ki lympung bapher bapher.
Lah ban pynkynmaw ruh ba ka jingïoh rung I-League jong ki club na Meghalaya ka la lah ban kyntiew ïa ka phutbol. Ïa kane la sakhi ha kito ki por jong ka jingtuid u paid byllien ban pyndap ïa ki jaka shong ha stadium kaba la long shisha kaba ai jingkyrshan ïa ki nongïalehkai phutbol bad ki club.
Ka lympung Durand Cup kaba dang shu dep bad kumjuh ruh ka lympung Subroto Cup kaba dang ïaid shakhmat, ki la long ki lympung kiba la pynkhie im biang ïa ka jingieit phutbol jong ki paidbah ka jylla. Ha kane ka lympung la sakhi ha man ki jingïalehkai jong ka Shillong Lajong, ka stadium ka dap beit bad wat haduh ba poi u pud ban ïaknieh tiket bad ruh ki hajar ngut kiba duk thied tiket, kaba ym pat ju kham jia koit mynno-mynno ba u paidbah un ieh bad kam bad jam ban hiar sha madan ban ai jingkyrshan ïa la ka jong ka club kaba mihkhmat napoh ka jylla.
Ka jingïoh rah jong ki khynnah U-15 ka skul Nongjri ïa ka nam lahduh ha ka lympung Subroto Cup bad kumjuh ruh ka jingïoh rung final jong ka Mynken Christian Higher Secondary Schol ha ka U-17 ha ka Subroto Cup ka la long sa kawei ka burom ïa ka Meghalaya ha ka Ri baroh kawei. Kane ka la ai mynsiem biang ruh ïa kiwei ki khynnah ban kin phai khmat sha ka kam ïalehkai phutbol. Hooid, kam dei kaba thymmai hynrei ki la don bun tylli ki shlem ai jinghikai ïalehkai phutbol na ka bynta ki hep barit kum shi bynta ban sei lypa ïa ka sap ïalehkai ka jong ki.
Ym tang kine ki lympung, hynrei lah ruh ban pynkynmaw ba dang shen ka club na Punjab ka Minerva ka la dep ban soi ïa u heprit Samborlang Rynjah na ka bynta 10 snem, hadien ba u la paw bha ha ki rynsan ‘social media’ halor ka jingtbit jong u ban ap kol. Ka sap jong une heprit ka la pynlong haduh ba wat u khlur nongap kol ka Argentina u Emiliano Martinez ruh u la buh ïa ka dur-khih ap kol u heprit Samborlang ha ka sla ‘Instagram’ ka jong u, kaba la pynlong ïa une u heprit ban paw ha kylleng ka pyrthei.
Ym tang kine, hynrei kiba bun ki rangïalehkai napoh Meghalaya kiba la dep ban ïoh mihkhmat ïa ka India ha ki lympung bapher bapher. Katto-katne ki kyrteng ba kham paw ki long kum u Eugeneson Lyngdoh, u Aiborlang Khongjee, Samuel Lyngdoh Kynshi, Rocus Lamare, Marlangki Suting, Lionel Daryl Rymmei bad bun bah kiwei ki rangïalehkai.
Kumta kaba donkam mynta, ka long ba ka Sorkar Jylla lyngba ka tnat ïalehkai ka dei ban shimkhia ha ka ban ym kut tang ha ka ban shu pynkup burom bad ai ki jingai sngewbha ne ka song pisa hynrei ban thaw ki lad ki lynti ban nang kyntiew shuh shuh ïa ka rukom ïalehkai jong kine ki heprit lyngba ka jingai training kaba biang bad paka.
Hooid ha nongbah Shillong, ngi la sakhi ba la bun ki madan kiba biang, bad wat ha ki thaiñ nongkyndong ruh la sdang ban pynbit pynbiang ki madan ïalehkai, hynrei kaba kongsan ka long ba ngi donkam ïa ki madan ba dei beit da u ‘natural grass’ ym da ki ‘artificial turf’.
Kaba kongsan bad kaba donkam, ka dei ba ka Sorkar kan don bad pyntreikam pura noh ïa ka Sports Policy na ka bynta ka bit ka biang jong ki nongïalehkai. Hooid ki la don ki jingai kum ka ‘scholarship’ bad kiwei ki jingai kiba ka la kyntiew sha ki nongïalehkai, hynrei donkam pat ban don ka policy kaba pura ba yn lah ban nang kyntiew shaphrang ïa ki kam ïalehkai.
Kumba long mynta, la ju sakhi ba tang la don kino-kino ki lympung, hangta ki synjuk, ki skul ne ka tnat ïalehkai, ka jied ïa ki rangïalehkai bad sa ai jingkilan met kaba shipor kum ka jingpynkhreh, hynrei kam don lypa ka jingai hikai ïa ki khynnah ba kin long lypa kiba la khreh.
